EFE.- A Consellería do Medio Rural informou de que o incendio forestal iniciado este martes en Cervantes está “controlado e sen chamas” desde onte, polo que espera “dalo por extinguido en breve”. O lume, que afectou unha casa de Padornelo, na parroquia de San Martín de Ribeira, avanzou pola ladeira contigua. Non obstante, Medio Rural aclarou que “non é certo que o lume chegase ás casas, senón que todo parece indicar que empezou nunha delas”, dende onde se estendería cara ao monte.
De feito, a través das imaxes das que dispón Medio Rural, “vese claramente como o vento empuxou as chamas cara ao monte”. Así pois, os efectivos procederon a sufocar primeiro as chamas da contorna das casas, antes de subir cara esoutra zona, onde o incendio logrou “superar un cortalumes”. Calcúlase que o terreo afectado xa alcanza as 15 hectáreas de monte raso, pero non hai que lamentar outros danos físicos ou materiais.
A XUNTA CONGRATÚLASE DA SÚA ACTUACIÓN
Dende a Xunta, coidan que o operativo “funcionou perfectamente”, xa que, segundo explican, tívose coñecemento do incendio ás 16.24 horas de onte e só “14 minutos despois, ás 16.38 horas, as brigadas de extinción xa estaban sobre o terreo”. Aínda que o lume quedou controlado durante a tarde-noite do martes, o persoal da Xunta continúa na zona desenvolvendo os traballos de remate e saneamento “ata que o incendio se dea por extinguido”.
En total, ao longo das últimas horas traballaron na extinción do lume 21 brigadas, 7 axentes, 1 técnico, 11 motobombas e 2 palas da Xunta de Galicia, ademais dun avión anfibio Canadair e un helicóptero Kamov do Ministerio de Agricultura, Pesca e Alimentación (MAPA).
Un incendio forestal en Cervantes alcanzou a parede dunha vivenda de Padornelo