Outeiro de Rei mantén vivo o legado de Manuel María como dinamizador cultural

O VI Convivio celebrarase este sábado 13 de xullo. Gaitas e pandeireitas, baile tradicional, camiñatas e comidas campestres serán algúns dos protagonistas da xornada, que tamén conta coa presenza de Isabel Risco

Romarías do Convivio da Cultura Galega en Outeiro de Rei | Casa-Museo Manuel María
Romarías do Convivio da Cultura Galega en Outeiro de Rei | Casa-Museo Manuel María

Outeiro de Rei vivirá unha xornada festeira e chea de tradición o vindeiro sábado 13 de xullo. Será da man do VI edición do Convivio da Cultura Galega, unha cita pensada para recuperar o espírito comunitario da vella romaría de Santa Isabel e para homenaxear a figura do poeta Manuel María.

Precisamente, é a Casa-Museo Manuel María, xunto á Federación de asociacións culturais Galiza Cultura, quen organiza o encontro. Aínda que a celebración virará en torno ao “alicerce do movemento cultural galego” que foi o escritor, as actividades non quedan só aí. Música, comida, camiñatas… son algunhas das propostas das que se poderá gozar en Outeiro.

O Convivio comezará ás 11:30 horas na horta da Casa-Museo, onde actuará o coro da asociación cultural e musical Solfa. Dende alí, os asistentes botarán a andar ao son das gaitas cara ao cemiterio de San Xoán, lugar onde está prevista unha ofrenda floral a Manuel María. Ademais, intervirá o arqueólogo e divulgador cultural Felipe Senén, xusto antes de baixar á Carballeira de Santa Isabel.

Case a un tempo, ás 12:15, o Convivio tamén garda un oco para unha xuntanza das entidades que conforman a Federación Galiza Cultura. Será no auditorio da Casa-Museo e alí organizarán novas iniciativas conxuntas para os próximos meses.

O resto das persoas non terán que agardar por que siga a festa. No medio do verde e ao pé do río, a Banda Municipal de Música de Rábade-Begonte-Outeiro, ‘Sons e soños’, dará un concerto a iso das 13:00 horas. Logo diso, será o momento para o xantar campestre, para o cal cadaquén deberá levar a súa comida, tal como se facía tradicionalmente. Posteriormente, ás 17:00 horas, iniciarase unha foliada dinamizada pola famosa actriz Isabel Risco e por numerosos grupos de música tradicional.

DEIXAR UN COMENTARIO

Please enter your comment!
Please enter your name here