InicioPolíticaO Concello de Lugo saca músculo con tres proxectos de mobilidade no...

O Concello de Lugo saca músculo con tres proxectos de mobilidade no último ano de mandato

Neste mes de maio o goberno local realizou tres grandes anuncios, forte comezo para un ano electoral no que quere superar o grao de execución dos anteriores orzamentos

PUBLICADA O

- Advertisement -

A comezos de maio, un investimento de 255.000 euros no ascensor de Fontiñas. Cinco días despois, 119.000 euros para o aparcadoiro do HULA. E o luns seguinte, o Concello de Lugo adianta que empregará 350.000 euros para sete aparcadoiros disuasorios. Os novos orzamentos permiten ao executivo local arrostrar o decisivo ano electoral con renovada enerxía; con razón dicía a alcaldesa, Lara Méndez, que a aprobación das contas ben merecía arriscar a posición persoal e do partido. A promesa da formación socialista de asumir os retos da mobilidade na cidade colle pulo, e faino nun intre moi oportuno.

A cuestión é se será tempo abondo. Ollando cara atrás, os orzamentos de 2016 –logo prorrogados– foron aprobados en maio e o goberno de Lugo foi quen de executar algo máis do 80 por cento. Desta vez, o total presupostado ascende un 5 por cento ata os 95 millóns de euros, en boa parte polo incremento nos investimentos, cunha suba do 40 por cento. Así, o concello aposta por sacar músculo dende o primeiro momento cunha vella demanda, o ascensor de Fontiñas, e ata 800 novas prazas en aparcadoiros públicos. A realización doutros proxectos, coma a renovación do bus urbano ou o carril bici ata o Miño, terá que agardar.

 

O ascensor de Fontiñas

A veciñanza do barrio contará en catro meses cun ascensor para salvar unha altura de 11 metros dende a Ronda de Fontiñas, cun novo alumeado para a andaina e a humanización e mellora da contorna. Cun investimento de 255.000 euros, o ascensor público de Fontiñas dará servizo a 10.000 veciños, calculan dende o consistorio, e vencellará a Ronda coa rúa Ramón Montenegro, unha conexión moi demandada para acceder ao centro de saúde e o núcleo de Lugo.

 

Aparcadoiro público do HULA

Este proxecto servirá para acondicionar unha parcela de 12.000 metros cadrados á beira do Hospital Universitario. Contando co prazo de adxudicación e execución, en cinco meses haberá 363 novas prazas gratuítas, co que o total de espazos de estacionamento creados no mandato na contorna do HULA acadará os 513. Os traballos contan cun orzamento de 119.000 euros para o movemento de terras, a instalación dun peche vexetal e a protección da mámoa, que contará cun control arqueolóxico na parcela. No concello estiman que o centro hospitalario conta con entre 3.000 e 4.000 usuarios diarios.

 

Sete aparcadoiros disuasorios

O polo de agora último anuncio da xunta de goberno local é o proxecto de acondicionamento de sete aparcadoiros disuasorios en distintos puntos da cidade, que abranguerán 6.000 metros cadrados e aportarán 203 novas prazas gratuítas. O prazo de execución calcúlase en 5 meses, cun orzamento conxunto de 350.000 euros. Apois de realizar un estudo técnico, o concello decidiu que os sete aparcadoiros estarán en Garabolos, Lamas de Prado, A Milagrosa, na Avenida de Madrid, Paradai de Arriba, e os outros dous no centro.

ÚLTIMAS

Mochilas sensorias neurodiverxentes nos Museos de Lugo

Os museos provinciais --Museo Provincial de Lugo, Museo do Mar de San Cibrao, Museo...

Obradoiros de coiro, cerámica e teares para celebrar os ‘Días Europeos da Artesanía’

A Vicepresidencia da Deputación de Lugo, a través da área de Artesanía, súmase á...

Coñecemos á ‘Galiartesá’, Pepa Lombao, oleira de Bonxe

O Galicia Confidencial presenta a serie 'Galiartesáns e galiartesas' coa que procura visibilizar diferentes oficios artesáns...

O Concello de Lugo defende que os recursos empregados no Ceao foron “suficientes”

A concelleira de Cohesión Social de Lugo, Ana González Abelleira, saíu ao paso das...