InicioA UlloaAumenta a presión hospitalaria en Lugo, que suma case 600 casos de...

Aumenta a presión hospitalaria en Lugo, que suma case 600 casos de Covid

Rexístráronse nas últimas 24 horas 25 contaxios diarios.

PUBLICADA O

- Advertisement -

A incidencia da Covid-19 segue en aumento en Galicia, que rexistra 6.495 casos activos despois de repuntar a 780 os novos contaxios deste coronavirus que manteñen a 187 persoas hospitalizadas –18 máis que a xornada anterior–, 32 delas en UCI. Pola súa banda, a taxa de positividade sobe a un 8,5 por cento.

Segundo os datos publicados na mañá deste xoves pola Consellería de Sanidade con rexistros ata as 18,00 horas deste mércores, aumentan a 32 as persoas ingresadas en UCI pola Covid-19 en Galicia –dúas máis– e a 155 as hospitalizadas noutras unidades –16 máis--, mentres que 6.308 pacientes permanecen en seguimento no seu domicilio.

Por áreas sanitarias, a presión hospitalaria aumenta en cinco das sete, mentres que se alivia na da Coruña e Cee e mantense sen cambios na de Santiago e Barbanza.

En concreto, na de Ourense aínda que descenden a catro os pacientes Covid en UCI –un menos–, aumentan a 51 os ingresados noutras unidades –catro máis–; mentres que na de Vigo soben a 12 os críticos –dous máis– e a 38 os hospitalizados noutras unidades –catro máis–.

Na área de Pontevedra e O Salnés mantéñense tres pacientes Covid en UCI e aumentan a 21 os doutras unidades –catro máis–; mentres que na de Ferrol queda un en críticos –un menos– e soben a 16 os doutras unidades –cinco máis–.

Polo seu lado, na de Lugo aumentan a tres os pacientes Covid en UCI –dous máis– e a seis os ingresados noutras unidades –un máis–; mentres que na de Santiago e Barbanza non hai cambios, con catro en críticos e cinco noutras unidades. Na única que se alivia lixeiramente a presión hospitalaria é na da Coruña e Cee, que mantén a cinco pacientes Covid en UCI e reduce a 18 os ingresados noutras unidades –dous menos–.

CASOS EN AUMENTO

Os casos activos de Covid-19 seguen en aumento e alcanzan no conxunto de Galicia os 6.495, que supoñen 522 máis que a xornada anterior, ao haber máis contaxios (780) que altas (256), ao que se suman dous falecementos. O xoves anterior –25 de novembro– había 3.573 infeccións activas na Comunidade galega.

As infeccións activas increméntanse de novo nas sete áreas sanitarias galegas, coa de Vigo á cabeza (+189), seguida da de Ourense (+137), Pontevedra e O Salnés (+75); A Coruña e Cee (+73); Lugo (+25); Santiago e Barbanza (+15) e Ferrol (+8).

Deste xeito, con máis casos mantense a de Vigo, con 1.841; seguida da de Ourense, con 1.709; A Coruña e Cee, con 911; Pontevedra e O Salnés, con 667; Lugo, con 573; Santiago e Barbanza, con 488; e á cola segue a de Ferrol, con 306.

Segundo os últimos datos actualizados na tarde deste pasado mércores polo Ministerio de Sanidade, Galicia conta cunha taxa a 14 días de 221,85 casos por 100.000 habitantes –a xornada pasada estaba en 203,97–, polo que supera a media de España, que está en 217,10.

MÁIS CONTAXIOS

Os novos contaxios de Covid-19 repuntaron a 780 en Galicia, que implican 76 máis que os 704 da xornada anterior, tras subir a 494 o martes e iniciar esta semana con 415. O xoves da semana pasada rexistráronse 506 e a cifra máis baixa desde que Galicia entrou en niveis de ‘nova normalidade’ corresponde ao luns 11 de outubro, cando houbo 14.

Por tanto, as persoas contaxiadas en Galicia desde o inicio desta pandemia aumentan a 191.418, das que 44.509 corresponden á área da Coruña e Cee; 39.970 á de Vigo; 27.752, á de Santiago e Barbanza; 24.033, á de Ourense; 22.320, á de Pontevedra e O Salnés; 20.754, á de Lugo; e 12.080, á de Ferrol.

Segundo os datos actualizados pola Consellería de Sanidade, desde o inicio desta crise sanitaria efectuáronse 3.013.065 PCR en Galicia, 7.736 máis que as rexistradas ata o día anterior e unhas 700 máis que as feitas a xornada pasada.

En canto á taxa de positividade das probas PCR –número de infeccións detectadas cada 100 test–, aumenta ao 8,54 por cento, tras ascender ao 7,7% o mércores despois de situarse nun 6,53% este martes e arrincar esta semana cun 6,33%. Por iso, continúa por encima do limiar do 5% que fixa a Organización Mundial da Saúde (OMS) para dar por controlada a pandemia.

FALECIDOS E CURADOS

As persoas falecidas diagnosticadas con Covid-19 desde o inicio desta pandemia en Galicia aumentan a 2.673, ao notificar este mércores a Consellería de Sanidade dúas novas vítimas.

En concreto, Sanidade informou este mércores 1 de decembro que faleceron un home de 91 anos no Hospital de Verín e unha muller de 81 no Complexo Hospitalario de Pontevedra (CHOP). Ambos tiñan patoloxías previas.

Pola súa banda, 182.286 persoas diagnosticadas de coronavirus curáronse na Comunidade galega desde o comezo desta crise sanitaria, que supoñen 256 máis que as contabilizadas ata o día anterior.

ÚLTIMAS

Obradoiros de coiro, cerámica e teares para celebrar os ‘Días Europeos da Artesanía’

A Vicepresidencia da Deputación de Lugo, a través da área de Artesanía, súmase á...

Coñecemos á ‘Galiartesá’, Pepa Lombao, oleira de Bonxe

O Galicia Confidencial presenta a serie 'Galiartesáns e galiartesas' coa que procura visibilizar diferentes oficios artesáns...

O Concello de Lugo defende que os recursos empregados no Ceao foron “suficientes”

A concelleira de Cohesión Social de Lugo, Ana González Abelleira, saíu ao paso das...

Bombeiros dá por extinguido o incendio no polígono de O Ceao e a Policía Científica inicia a súa investigación

Bombeiros de Lugo deu por extinguido este mércores o incendio que calcinou na xornada...