O Xulgado do Social número 1 de Lugo ditou unha sentenza que recoñece a relación laboral con Frigolouro de 105 traballadores que prestaban servizos como falsos cooperativistas nas instalacións de Novafrigsa situadas en Lugo. Ambas as empresas pertencen ao Grupo Coren.
Segundo constata a sentenza, con data de 30 de xullo, os empregados facían o seu traballo como supostos cooperativistas de Servicarne, sociedade que a Administración do Estado xa descualificou como cooperativa, aínda que este caso está en estudo pola Audiencia Nacional.
Todo partiu dunha demanda interposta en xaneiro de 2019 pola Tesouraría Xeral da Seguridade Social –coadxuvada polo sindicato CC.OO.– tras unha visita de inspección ao secadero lucense. Pola súa banda, Frigolouro alegaba que a relación dos empregados era “mercantil” e con Servicarne, que “é unha cooperativa real con ampla bagaxe na actividade das cárnicas”.
Con todo, a xuíza confirma que estas 105 persoas actuaban non como falsos autónomos, senón como traballadores de Frigolouro na planta de Novafrigsa de Lugo por varios motivos. Un deles é que “a alternativa” que se lles deu a facerse cooperativistas foi “ser despedidos”.
“Os socios cooperativistas que declararon na acta (de inspección) e na vista (do proceso xudicial) non querían realmente pertencer á cooperativa, pero derívaselles a esta opción se queren traballar en Frigolouro”, recalca a sentenza.
Así mesmo, “a sensación que transmiten (os empregados) é que se sentiron sempre traballadores de Frigolouro, aínda que formalmente sexan autónomos, e que ningunha relación tiveron coa cooperativa senón a través da coordinadora que perciben como unha xefa máis pero que non dá ordes directas”.
Tamén razoa a xuíza que estas persoas “non participan nas decisións” de Servicarne “como calquera outro cooperativistas, polo que funcionan como verdadeiros empregados laborais” aínda que “sen todos os dereitos sociais” que teñen aparellados.
“No fondo os cooperativistas son peóns operativos en que por unha banda está quen lles marca a produción, que sería Frigolouro, e por outra quen lles paga a nómina, que sería Servicarne”, resume a xuíza para considerar “probado” a fraude.
Por todo iso, a sentenza estima a demanda presentada pola Tesouraría Xeral da Seguridade Social e secundada por CC.OO. para declarar de “natureza laboral” a relación entre estes 105 falsos cooperativistas e Frigolouro, do Grupo Coren. O fallo non é firme e contra el cabe recurso ante a Sala do Social do TSXG.
CC.OO. REIVINDICA O SEU LABOR
Ao fío desta decisión, CC.OO. emitiu un comunicado no que considera esta sentenza unha “nova vitoria” dos seus servizos xurídicos, que “fai máis de tres anos iniciou unha intensa campaña contra a figura dos falsos autónomos no sector cárnico“.
“Ao longo de 45 páxinas, a sentenza baséase no labor sindical e xurídico realizada por CC.OO. nos últimos anos e declara probada a relación laboral entre os falsos autónomos e o Grupo Coren”, reivindica o sindicato.
Así mesmo, CC.OO. considera que este fallo do xulgado lucense “abre a porta a unha reclamación económica” contra Servicarne e Coren polas cotas de autónomos indebidamente pagas nos últimos catro anos, sobre medio millón de euros, de acordo con cálculos do sindicato; así como polas cotizacións que deixou de percibir a Seguridade Social.
