As piscinas de Frigsa son sometidas a unha revisión total

O Concello de Lugo aproveita esta tarefa periódica para instalar novos sistemas de regulamento, revisar a estanquidade dos vasos e substituír elementos deteriorados

O voceiro municipal Miguel Fernández supervisa a revisión da piscina vella de Frigsa | Concello de Lugo
O voceiro municipal Miguel Fernández supervisa a revisión da piscina vella de Frigsa | Concello de Lugo

Despois da detección de incidencias menores nas instalacións, o Concello de Lugo realiza unha revisión completa na máis vella das piscinas de Frigsa. O goberno local aproveita o peche previsto para este mes de agosto para acometer tarefas de mantemento e renovación nesta sección do complexo polideportivo.

Así o avanzou o voceiro municipal e concelleiro de Deportes, Miguel Fernández. Os traballos comezaron esta semana e afectan ao vaso de compensación da piscina antiga de Frigsa, que será baleirada e limpada en primeiro lugar.

A intervención comprende a instalación de novos sistemas de control para mellorar a eficiencia do circuíto e o funcionamento do vaso de compensación das piscinas.

Por outra banda, o perímetro someterase a unha revisión exhaustiva no vaso da piscina máis vella das instalacións de Frigsa para selar posibles fisuras, e repoñer as placas de cerámica que puideran estar danadas.

Asemade acometerase o acondicionamento da entrada e o pintado de diversas áreas. Estas e outras melloras de pequeno importe garanten en conxunto “a calidade dun servizo que usan a diario centos de persoas durante once meses ao ano”, resaltou o voceiro municipal.

DEIXAR UN COMENTARIO

Please enter your comment!
Please enter your name here