Un congreso virtual promovido por un grupo de investigación do Campus Terra da USC debaterá un total de 229 traballos sobre a química orgánica sintética. Será na vixésima cuarta edición da Conferencia Electrónica de Química de Orgánica Sintética (ECSOC-24), que se celebrará desde este 15 de novembro ata o 15 de decembro.
O grupo de Novas Metodoloxías Sintéticas (SWT) foi o impulsor desta conferencia electrónica, pioneira entre as do seu xénero e que lle dará visibilidade ao liderado da USC na aplicación e no uso deste tivo de tecnoloxías.
Respecto da temática das comunicacións presentadas, o presidente do comité científico da ECSOC-24 destaca o incremento de traballos en todas as seccións, aínda que fai especial fincapé no capítulo de química computacional, no que se quintuplicou o número de comunicacións. Un feito que podería vir dado polas dificultades que depara a pandemia para desenvolver traballo experimental en laboratorio e que obriga a pasarse á quimica ‘in silico’ (traballo en ordenador ou por simulación computacional).
Unha vez finalizado o prazo de presentación de traballos e comunicacións científicas, as distintas sesións de debate e análise programadas no marco desta conferencia internacional desenvolveranse de xeito virtual desde o 15 de novembro ata o 15 de decembro de 2020 a través do espazo web do congreso. Durante estes 30 días, os químicos e investigadores de países de todo o mundo interesados na temática que aborda a ECSOC 24, teñen unha boa oportunidade para intercambiar e compartir traballos sobre macromoléculas, polímeros, líquidos iónicos, química computacional, síntese iónica por microondas…