O colectivo ADEGA (Asociación para a Defensa Ecolóxica de Galicia) cuestiona a necesidade da construción da Rolda Leste en Lugo e advirte sobre o impacto que tal infraestructura terá sobre o territorio. A xeito de reivindicación, convocan unha andaina para o vindeiro domingo 15 de marzo polas zonas afectadas.
O segundo tramo da Rolda Leste, previsto pola Consellería de Infraestructuras e Mobilidades, conectaría a glorieta na intersección coa estrada LU-530 (Lugo-Fonsagrada) coa glorieta da Tolda da Castela, de modo que se pretende pechar a circunvalación que rodea a cidade de Lugo.
Porén, ADEGA coida que “con este tipo de vías favorécese o illamente de núcleos” pois, “ao ter características de autovía urbana, non permite a continuidade de moitos dos camiños históricos que chegaban a Lugo”. Segundo o colectivo, a obra afectaría os muros construídos en pedra seca, cuxa técnica está declarada Patrimonio Cultural, ou ás carballeiras e soutos, que serían tallados malia ser “tan necesarios para reducir as emisións de gases de efecto invernadoiro”.
A asociación cre que a construción de novas vías “debera estar ben xustificada, con datos actuais e cun proxecto de mobilidade real” que sopese “o impacto” e “os beneficios” para a cidadanía.
O PERCORRIDO
Para pór o punto de mira nesta situación, ADEGA propón unha andaina de cinco quilómetros polos terreos afectados pola futura Rolda Leste. Así, o vindeiro domingo 15 de febreiro, o percorrido comezará ás 10:00 horas na igrexa de San Fiz. Dende aí, atravesarán a Carballeira de Montirón, pasarán por Castelo e pararán en Bosende. O punto de remate será, de novo, San Fiz.
As persoas interesadas poden inscribirse nesta actividade no teléfono 982.24.02.99 ou a través do enderezo electrónico adegalugo@adega.gal.
Máis adiante, organizarán un debate público para contrapoñer posturas acerca do proxecto da Rolda Leste. Será o 22 de abril, ás 19:30 horas, no IES Lucus Augusti.
Para deixar de producir gases hai que comer menos fabas. Faino polo planeta. Voltemos as zocas!