O grupo municipal do Partido Popular en Lugo denuncia o afundimento de lastros na rúa Soto Freire e achaca esta situación a “unha obra que quedou mal executada”, pois “a vía leva aberta tan só dende hai dous anos”. O PP sinala que esta problemática é común a outras zonas da cidade, polo que solicitan unha reparación en profundida e periódica das rúas empedradas de Lugo.
O concelleiro popular Rafael Pérez Prado criticou que esta é “unha tónica noutros puntos da cidade”, como na praza de Alacante ou en Campo Castelo. Explicou que, cando chove, os lucenses non se libran das pozas aparecidas polo afundimento do pavimento, “unhas veces por mala execución da obra e outras polo paso de vehículos de reparto de tonelaxe”.
Para o Partido Popular estas rúas son tres exemplos do “deterioramento” da cidade. “Tal e como está Soto Freire semella que a inauguraron hai máis dunha década”, insistiu Pérez Prado. “A imaxe de deixadez agrávase cando comprobamos que só sobrevive unha árbore das sete que plantaron”, engadiu.
Por iso, e tendo en conta o reforzo feito na brigada de obras, solicita que se faga unha planificación para reparar en profundidade e de forma periódica as vías con lastros que hai na cidade.