Convocan unha manifestación en Lugo de apoio a Pilar de Lara

A Plataforma Cidadá contra a Impunidade do Caso Carioca rexeita de plano a sanción contra ela.

(Arquivo) A xuíza Pilar de Lara | EP
A xuíza Pilar de Lara | EP

A Plataforma Cidadá contra a Impunidade do Caso Carioca convocou unha concentración de apoio, que terá lugar o vindeiro mércores -día 3 de abril- ás 20:00 horas diante do edificio dos Xulgados de Lugo, “en apoio ao traballo da xuíza” Pilar de Lara e “en contra das desproporcionadas medidas disciplinarias adoptadas contra ela”.

En rolda de prensa, a plataforma expresou o seu “apoio e agradecemento á figura de Pilar de Lara“, instrutora da Operación Carioca, unha causa aberta para investigar a existencia dunha suposta trama ilegal de proxenetismo na provincia de Lugo na que supostamente estaban implicados axentes dos Corpos e Forzas de Seguridade do Estado.

A plataforma considera que a xuíza “traballou arreo, con recursos limitados e sen ceder ante as distintas presións externas recibidas e mesmo ameazas contra a súa integridade persoal”.

Por iso, este colectivo rexeita “de plano” a sanción que o Consello Xeral do Poder Xudicial quere aplicar á xuíza, sete meses e un día de suspensión, o que implicaría a perda de destino e, consecuentemente, a súa retirada do Xulgado de Instrución número 1 de Lugo.

SANCIÓN “DESPROPORCIONADA”

Desde o seu punto de vista, é “desproporcionada e ten a clara intencionalidade de apartala dos Xulgados de Lugo”. Para este colectivo “é inxustificable que se pretenda impor un castigo de tal calibre á xuíza Pilar de Lara por algo tan corrente, até o punto de que é un mal endémico do sistema xudicial, como é dilación na instrución de macrocausas”.

“E menos baixo a acusación de escasa actividade instrutora, cando está máis que documentado que a actividade de investigación desta xuíza nas causas nas que estivo e está á fronte é inxente, con sumarios tan voluminosos como os de calquera xulgado central, pero coa terceira parte de persoal funcionario” do que teñen ese tipo de unidades, engade.

Ademais, a plataforma lembra que o cambio de maxistrado nas pezas do Caso Carioca “a estas alturas” suporía un maior atraso na finalización da instrución.

DEIXAR UN COMENTARIO

Please enter your comment!
Please enter your name here