Investigado un vilalvés por estafar máis de 8.000 euros en Internet

investigado na localidade de Guitiriz a un veciño por simular unha denuncia falsa

Axentes da Garda Civil visualizan unha pantalla dun ordenador nun operativo contra a venda por Internet / GC

A Garda Civil imputou en calidade de investigado na localidade de Vilalba (Lugo) a un veciño deste municipio de 20 anos de idade como presunto autor dun delito de estafa por Internet en relación a cargos non autorizados.

Segundo informou o Instituto Armado, as pescudas iniciáronse por mor dunha denuncia presentada pola presunta vítima no mes de setembro do pasado ano na provincia de Pontevedra, na que declarou que se efectuaron cargos non autorizados na súa conta bancaria.

As mesmas fontes apuntaron que se inclúen dúas transferencias por importe de 8.800 euros. Tras as denuncias iniciáronse pescudas que levaron a investigación do presunto autor dos feitos. A persoa investigada foi posta a disposición xudicial.

SIMULACIÓN DE DELITO

Por outra banda, a Garda Civil imputa en calidade de investigado na localidade de Guitiriz (Lugo) a un veciño este municipio de 45 anos de idade como presunto autor dun delito de simulación de delito e denuncia falsa.

Os feitos ocorreron tras denunciar a persoa investigada a subtracción dunha furgoneta, propiedade dun familiar. Manifestou que a deixou estacionada nunha rúa da localidade lucense de Guitiriz o pasado 9 de febreiro e, cando foi a recollela horas máis tarde, non se atopaba no lugar.

Por iso, iniciouse unha investigación policial e comprobouse que dito vehículo estaba implicado o mesmo día nun accidente de circulación cun terceiro e os ocupantes da furgoneta, supostamente subtraída, déronse á fuga abandonando o lugar.

Froito das pescudas realizadas polos axentes procedeuse a investigar ao denunciante polos delitos de simulación de delito e denuncia falsa. Foi posto a disposición do Xulgado de Vilalba.