Méndez di que Xunta nunca ofreceu un parque de bombeiros comarcal

A alcaldesa de Lugo, Lara Méndez, pide que o goberno galego contacte formalmente polo parque de bombeiros e "non mande recados polos medios de comunicación"

Bombeiros de Lugo | Concello de Lugo
Bombeiros de Lugo | ARQUIVO

EFE – A alcaldesa de Lugo, Lara Méndez, asegurou este mércores que non existe comunicación ou proposta formal por parte da Xunta de Galicia para iniciar a comarcalización do parque de bombeiros da cidade. A transformación permitiría estender o servizo de emerxencias a outros seis concellos, para cubrir unha poboación de 120.000 habitantes.

“Podemos dicir que levamos meses agardando por unha comunicación oficial por parte da Xunta, porque vemos que noutros concellos, coma o de Santiago, houbo xa reunións a tres bandas entre a Deputación, a Xunta e o Concello”, dixo Méndez. No canto de devandita comunicación, precisou a rexedora, o delegado territorial José Manuel Balseiro optou por “enviar recados a través de terceiros”.

Nese senso, subliñou que “se tanto apuro” ten o goberno galego por solventar a situación, o que ten que facer “é dirixirse formalmente ao Concello de Lugo, por respecto aos cidadáns, veciños e veciñas”.

Por outra banda, lembrou que noutros lugares onde si se produciu a xuntanza a tres bandas, estase “parando un pouco” o proceso de comarcalización. Méndez atribúe este feito á situación que viven as administracións locais, pois “amplíase moito a ratio de poboación que hai que atender” e “prodúcese unha mingua no persoal que hai que valorar”.

“Sempre puxen sobre a mesa dúas premisas claras: por unha banda, que a comarcalización non pode minguar a seguridade na cidade; e por outra, tampouco pode incrementar o custe” que soportaría o Concello de Lugo. “Terían que entrar outras administracións”, engadiu Méndez, para quen é “chamativo que nos manden un recado polos medios de comunicación, e non teñan a delicadeza nin a deferencia” de realizar unha comunicación oficial.

DEIXAR UN COMENTARIO

Please enter your comment!
Please enter your name here