O Sanatorio Portela de Lugo revive tras case tres décadas de espera

O edificio, no catálogo de Patrimonio Cultural, agardaba dende a rehabilitación de 2017 a converterse en sede do Instituto Nacional de Estatística

O antigo sanatorio Portela, deseñado por Alfredo Vila | Guido Álvarez Parga
O antigo sanatorio Portela, deseñado por Alfredo Vila | Guido Álvarez Parga

Lugo preservará parte do seu patrimonio arquitectónico coa entrega do antigo Sanatorio Portela ao Instituto Nacional de Estatística (INE). O traspaso estaba previsto dende que en 2017 finalizara a rehabilitación do edificio, incluído no catálogo de Patrimonio Cultural de Galicia. A institución aforrará case 100.000 euros anuais do alugueiro da actual sede provincial, asegurando un uso para este inmoble abandonado dende a década dos noventa.

A subdelegada do Goberno, Isabel Rodríguez, foi a encargada de inaugurar oficialmente o renovado edificio. A licenza de primeira ocupación está pendente de  “pequenas obras na vía pública”, paso previo a comezar a nova actividade. O Sanatorio Portela é un vestixio da arquitectura de Alfredo Vila –referente canda a Eloy Maquieira do estilo racionalista– e foi erixido a finais da década dos corenta.

Subdelegación do Goberno

Rodríguez asegurou que o desbloqueo do traspaso foi posible polo traballo do Goberno, pois “levaba moito tempo atrancada”, atribuíndo a demora ao executivo saínte, e que presidía o popular Mariano Rajoy. O director en Lugo do INE, José Manuel Colmenero, avanzou que o edificio estará operativo “na contorna do verán”.

A sede centralizará no vello Sanatorio Portela os servizos con 31 traballadores, seguindo a política do INE de contar con edificios propios e prescindir dos alugueres. A adquisición, que mereceu unha investigación xudicial polas diferenzas na valoración do inmoble, levou aparellado un investimento de 2,4 millóns de euros para a rehabilitación.

O edificio (Avenida do Doutor García Portela, 1) conta con catro plantas, con arredor de 1.700 metros cadrados, un considerable incremento na superficie dispoñible para o INE. “Agora estamos nun edificio alugado que está ben situado, aínda que con pouco espazo para expandirse, e nese sentido gañamos moito”, explicou Colmenero. “Ponse en valor un edificio moi importante para Lugo, construído a mediados do século XX e que está catalogado no inventario do Patrimonio Cultural de Galicia”.

DEIXAR UN COMENTARIO

Please enter your comment!
Please enter your name here