O líder do Partido Socialista na provincia de Lugo, Álvaro Santos, rexeita a posibilidade de eventuais pactos co Partido Popular a raíz das eleccións municipais do 26 de maio. O secretario xeral provincial confirmou este punto despois das declaracións do máximo dirixente do socialismo galego, Gonzalo Caballero, que apuntan na mesma dirección.
Santos explicou, como publica GaliciaConfidencial, que os acordos do PSdeG se producirán con aquelas forzas políticas “que impulsan o progresismo, e que perseguen mellores servizos e mellores infraestruturas”. Nas declaracións recollidas por Europa Press, o líder provincial afirmou coincidir coas teses de Caballero. “O que dixo o secretario xeral, á parte de acertado, é o que vén facendo o Partido Socialista dende sempre”.
Por outra banda, Santos animou a Caballero a incorporarse ao Parlamento de Galicia, porque cre que dende o Hórreo podería desenvolver mellor o seu “traballo de fiscalización” ao goberno autonómico do Partido Popular. Con anterioridade, o secretario xeral do partido en Galicia xa admitira esta posibilidade na Cadena Ser, dando a entender que a entrada á cámara se produciría “antes do verán”.