Seis nominacións aos Goya para ‘La sombra de la ley’, con alma lucense

O filme de Dani de la Torre e protagonizado por Luis Tosar é o sexto con máis nominacións, mentres que Dhogs, do meirego Andrés Goteiro, queda fóra dos Goya

Luis Tosar protagoniza 'La sombra de la ley', filme de Dani de la Torre rodado en Lugo | Kubrick Cinema
Luis Tosar protagoniza 'La sombra de la ley', filme de Dani de la Torre rodado en Lugo | Kubrick Cinema

As nominacións aos Goya deixan sensacións encontradas na provincia. Dhogs finalmente queda sen competir na gran gala do cinema español; a cinta de Andrés Goteira, natural de Meira, optaba en dezanove categorías. Porén, La sombra de la ley, de cerna lucense, recibiu seis nominacións aos premios da Academia das Artes e as Ciencias Cinematográficas.

As grandes favoritas son El reino, de Rodrigo Sorogoyen, e Campeones, de Javier Fesser, con trece e once categorías respectivamente. Entre a representación galega, o compostelán Luis Zahera como actor de reparto; Javier Gutiérrez, criado en Ferrol, aspira a un Goya no rol principal; e dous vigueses, Guillermo de Oliveira –documental– e Manuel Gago –curtametraxe–.

A alma lucense de La sombra de la ley

La sombra de la ley está dirixida por Dani de la Torre, natural de Monforte de Lemos, e conta co protagonismo do sobranceiro Luis Tosar, con ascendencia en Cospeito e nado en Lugo. A cinta así mesmo ten como localización a capital lucense, e na rodaxe participaron varios titulados da Fundación TIC e tres alumnos da Escola de Imaxe e Son.

Lugo foi escollida para poder facer realidade a ambientación dos anos vinte. A filmación tivo lugar na rúa Bispo Aguirre e no Círculo das Artes, polos que circularon coches de época.

A grabación desenvolveuse o pasado ano en oitenta decorados exteriores e interiores. Comezou en Barcelona, centro da trama, pero a meirande parte da acción discorre en Galicia (Lugo, Pontevedra, Monforte de Lemos, A Coruña e Santiago).

DEIXAR UN COMENTARIO

Please enter your comment!
Please enter your name here