Nun raro exercicio de consenso, cinco partidos con representación na corporación local de Lugo presentaron unha proposición de urxencia conxunta para resolver o derrubamento das torres do Garañón. Respostan así á iniciativa unilateral e acelerada do Concello, que hai dez días propuxo converter a parcela CS-5 en zona verde, sen coñecer aínda o impacto desta medida sobre as arcas municipais.

Os grupos do Partido Popular, Lugonovo, Bloque Nacionalista Galego, Ciudadanos e Alternativa Cidadá de Esquerdas consideran que esta solución consensuada “un exercicio de responsabilidade” perante o plan da alcaldía para o Garañón, “que non conta con ningún tipo de aval técnico e xurídico”. Precisamente, os socios de investidura condicionaban o apoio á proposta inicial do grupo socialista á existencia de garantías por parte dos técnicos.

A proposición de urxencia, que será debatida no pleno do xoves, ten orixe na importante repercusión económica que terá que afrontar o Concello de Lugo para levar a cabo o derrubamento das torres. Así, é intención dos cinco partidos a redacción dun estudo de alternativas para o ordenamento urbanístico do predio paralizado pola xustiza, co obxectivo de minimizar a indemnización ao promotor, con quen a alcaldía tenta acadar un acordo ofrecendo a cambio outros terreos edificables de titularidade municipal.

Dentro da iniciativa esixen ao executivo local avanzar “con rapidez e decisión” no expediente relativo á reposición da legalidade das torres das costas do parque, en resposta ás tres decisións xudiciais relativas á contorna do Garañón. 

O acordo proposto polos grupos políticos de Partido Popular, Lugonovo, Bloque Nacionalista Galego, Ciudadanos e ACE-EU consta así:

Que por parte do Concello de Lugo se inicie, con medios propios, un 
estudo de alternativas para a tramitación da modificación puntual da 
Unidade de Actuación CS-5 (URPI 58 no PXOM) na que como criterios 
prioritarios se fixen: 

• A menor incidencia económica posible para as arcas municipais.

• A conversión en zona verde da maior superficie posible.

• O menor impacto visual da edificabilidade resultante, no caso de que esta
  edificabilidade exista