Seragro presentará en Veterinaria as tecnoloxías da gandería de precisión

As XVI Xornadas Técnicas de Vacún de Leite abordarán as oportunidades que ofrece a tecnoloxía para conseguir explotacións eficientes

Presentación das XVI Xornadas Técnicas de Vacún de Leite de Seragro | Seragro
Presentación das XVI Xornadas Técnicas de Vacún de Leite de Seragro | Seragro

As XVI Xornadas Técnicas de Vacún de Leite explicarán como a gandería de precisión pode aumentar as cotas de eficiencia nas explotacións. Baixo tal pretexto, congregará na Facultade de Veterinaria de Lugo ás mentes expertas en novas tecnoloxías que permiten monitorizar e robotizar a xestión e os procesos de alimentación, muxido ou reprodución. Será os días 8 e 9 de novembro, baixo a coordinación de Seragro

En representación da Sociedade Cooperativa Galega presentou o evento a presidenta Noelia García Santoalla, acompañada do vicepresidente da Deputación, Argelio Fernández Queipo, o concelleiro de Medio Rural de Lugo, Miguel Fernández, e os coordinadores do programa, Miguel Varela e Juan Camilo Gómez Hermida.

García Santoalla agradeceu á autoridade provincial o “apoio ininterrompido á celebración destas xornadas”, aproveitando para repasar as feblezas e fortalezas do sector lácteo galego. A máxima responsable de Seragro salientou a capacidade de traballo e a actualización dos ganderías, sinalando asemade as oportunidades da tecnoloxía para aumentar as capacidades das explotacións. 

Bioseguridade e resistencia aos antibióticos

As XVI Xornadas Técnicas darán comezo o xoves 8 coa intervención da veterinaria especialista en Bromatoloxía, Sanidade e Tecnoloxía dos Alimentos María Somolinos. A especialista ofrecerá un faladoiro arredor do tratamento intelixente da hixienización da auga, dentro do concepto global de bioseguridade, para aumentar a rendibilidade da explotación.

As novas tecnoloxías serán a cerna da programación, afondando nas ferramentas nos eidos da podoloxía, a alimentación, a reprodución, o muxido e a xestión para lograr unha gandería de leite máis precisa e eficiente. Colaborarán nestas cuestións varios técnicos de Seragro, a saber, Federico Romero Yuste, Víctor Fuentes Veiga, José Luis Míguez Vázquez, Albino Iglesias Varela e Patricia Gómez Presa. No serán, examinarán os principais desafíos que arrostran no sector. 

Patricia Gómez, xestora técnica económica de Seragro | Transmedia
Patricia Gómez, xestora técnica económica de Seragro | Transmedia

Pola súa banda, o doutor Bruno González-Zorn analizará as resistencias aos antibióticos, asunto con implicacións na saúde pública. O profesor de Sanidade Animal da Universidade Complutense de Madrid concienciará a técnicos e gandeiros acerca da importancia dun uso responsable destes produtos para que continúen a ser efectivos. 

Pechando o xoves, a mesa redonda de xestión dos xurros contará con Juan Castro Insua, investigador do CIAM, e Juan Álvarez de la Puente, delegado da Dirección Xeral de Agricultura e Desenvolvemento Rural da Comisión Europea. O primeiro explicará o manexo do xurro adaptado ás condicións do clima e o solo de Galicia, práctica máis eficiente que a inxección directa; mentres que o segundo achegará a visión global e avanzará as liñas mestras da nova Política Agraria Común en protección medioambiental e requisitos das axudas.

Podoloxia e recría

O programa do venres iniciarase cunha conferencia sobre o impacto das coxeiras na economía e no benestar animal, a cargo do xefe do Servizo de Ruminantes do Hospital Clínico Veterinario da Facultade de Veterinaria da UCM, Francisco Javier Blanco Murcia. Despois, o enxeñeiro Iván Ansia Vázquez, asistente de investigación na Universidade de Illinois, centrará a intervención no manexo nutricional e social das xatas lactantes para a cría en parellas e grupos nas primeiras semanas de vida. 

Dende un punto de vista internacional, Carlos Hernández Mariscal, xerente de Control da Produción da Asociación Holstein de México, comparará a eficiencia nas cortes leiteiras mexicanas, explicando os aspectos de maior retorno económico. O bloque vespertino achegará información sobre a utilidade da necropsia para previr futuras mortes nas explotacións, a cargo do veterinario e perito en sinistros pecuarios Javier Camba Méndez. 

Espazo para os gandeiros

As experiencias dos gandeiros terán oco en tres faladoiros sobre tres estratexias distintas para a produción de leire. Compartirán o seu saber Ricardo Gómez, de Outeiro SC, con experiencia na raza Jersey; Santiago García Souto, de Finca La Asunción, falará sobre a súa vida dedicada á frisona; e Jesús Perfecto Fernández Pérez, da gandería de Pazos SCG, divulgará as características do sistema ProCROSS.

A clausura das XVI Xornadas Técnicas será responsabilidade da química e divulgadora científica Déborah García, e incluirá o tradicional brinde do leite. De seguido celebrarase o encontro gandeiro no vestíbulo da Facultade de Veterinaria, coa presentación do novo servizo de Pioneer para o mapeo e seguimento de predios vía satélite.  

DEIXAR UN COMENTARIO

Please enter your comment!
Please enter your name here