Os trece días nos que Feijóo salvou as opcións electorais en Lugo

A estratexia de comunicación durante a crise da Residencia evidencia o plan orixinal da Xunta: retrasar no posible os compromisos de menor impacto electoral

O presidente da Xunta, Alberto Núñez Feijóo, incrementou a súa presencia en Lugo por mor da crise da Residencia | Óscar Bernárdez
O presidente da Xunta, Alberto Núñez Feijóo, incrementou a súa presencia en Lugo por mor da crise da Residencia | Óscar Bernárdez

O plan integral da Residencia é a máis ambiciosa das alternativas plantexadas para o vello Hospital Xeral de Lugo. O acordo subscrito en 2017 entre a Xunta de Galicia e a Seguridade Social, propietaria do inmoble, recolle e irmanda as propostas verquidas dende a clausura do centro, a comezos de 2011. Se foi posible o compromiso, foi por mor da presión das organizacións veciñais e o importante retroceso do Partido Popular nos comicios de 2015, nos que perdeu sete mil votos e tres concelleiros. Compensar a demora levaba, en teoría, a concentrar o desembolso.

Consciente da importancia de xestionar os tempos, o executivo que preside Alberto Núñez Feijóo fragmentou os trámites do plan integral para que as obras do complexo impactaran nos ciclos electorais de 2019 (municipais) e 2020 (autonómicas). O barrio da Residencia pagaría a falta de previsión da Xunta, quedando orfo durante case unha década, para que o investimento chegase no intre oportuno. En primeiro lugar iría o emblema do novo modelo de xestión sanitaria, o centro integral de saúde, e progresivamente o resto de dotacións: a oficina de emprego, a residencia da terceira idade, o centro de emprendemento aeronáutico, a planta de biomasa e a comisaría.

A prioridade do centro de saúde é lóxica, pola saturación das urxencias en Lugo, e debido a que o uso sanitario é o único contemplado para estes edificios no Real Decreto de 1990. Para acadar outras funcións na Residencia, era precisa a retrocesión dos edificios, que a Xunta completou por partes e fóra de prazo; o 31 de maio, mentres o Congreso dos Deputados debatía a moción de censura, o Consello deixou sen efecto estes trámites nun acordo opaco.

A invalidación foi coñecida o xoves 13 de setembro, logo dun inquérito da nova subdelegada do Goberno na provincia, Isabel Rodríguez. Ás poucas horas de trascender, Feijóo dixo que se trataba “dunha confusión” e que estaban agardando pola licenza para o centro integral de saúde. Pouco despois, o delegado territorial José Manuel Balseiro explicaba que a anulación fora petición do Goberno saínte, e que nada cambiara no proxecto. Porén, a estratexia comunicativa da Xunta durante os sete días que seguiron reflictiu todo o contrario.

O venres 14, silencio en San Caetano. O gabinete autonómico considera que as explicacións son abondo, a pesar de que ese mesmo día presentábase en sociedade o alcaldable do Partido Popular para Lugo, Ramón Carballo. Canda el estivo Feijóo, que circunscribiu o discurso ás cualidades do candidato. Malia este esforzo por evitar o asunto, a polémica pola Residencia marcaba o primeiro acto oficial de Carballo, un pésimo precedente. Entón xéstase a nova estratexia de crise.

Con renovado pulo, o luns 17 a Xunta anuncia a sinatura do convenio para o centro integral de saúde, reafirmándose no cumprimento íntegro do proxecto. O martes 18, Feijóo regresa a Lugo para inaugurar a escola infantil de Garabolos, ocupando o lugar que correspondería ao exconselleiro de Política Social –departamento do que depende a rede de gardarías–, José Manuel Rey Varela. Nesa ocasión, derivou a responsabilidade das cuestións técnicas e adiantou que a Xunta pediría as licenzas do centro de emprego “nas vindeiras semanas” e da residencia “antes de finalizar o ano”.

Carballo, Balseiro e Feijóo | Óscar Bernárdez
Carballo, Balseiro e Feijóo | Óscar Bernárdez

O mércores 19, a máxima autoridade autonómica volveu á provincia, desta vez a Foz, para asinar a aprobación do Plan Xeral de Ordenación Municipal. O retroceso no plan da Residencia seguía sen aclararse cando ao día seguinte Carballo celebraba o primeiro acto de campaña en Lugo. O golpe de efecto chegaría o venres 21, cun novo anuncio.

Ao tempo que o conselleiro de Sanidade, Jesús Vázquez, asinaba o acordo rector para o proxecto do centro integral de saúde, a Xunta notificaba que a aceleradora do sector aeronáutico estaría operativa na cidade de Lugo en novembro. Será provisionalmente no Pazo de Feiras e Congresos ata a construcción do centro de emprendemento, para o que o executivo reservará 3 millóns de euros nos Orzamentos de 2019.

Así as cousas, habería que agardar ata o 26 para que a Xunta dera explicacións pola anulación dos trámites da Residencia. Compareceu no Parlamento o conselleiro de Facenda, Valeriano Martínez, para expoñer que a invalidación das retrocesións fíxose co gallo de axilizar os trámites, reducindo os expedientes de sete a dous. Case catro meses pasaran dende o acordo oculto, e trece días dende que o tema era de dominio público.

José Manuel Balseiro, Ramón Carballo, Ana González Abelleira e Lara Méndez durante a inauguración da escola infantil de Garabolos | Óscar Bernárdez
José Manuel Balseiro, Ramón Carballo, Ana González Abelleira e Lara Méndez durante a inauguración da escola infantil de Garabolos | Óscar Bernárdez

O conflicto aberto polo complexo da Residencia chegou xusto cando Feijóo tiña que arrostrar a reforma do gabinete. A crise de goberno era imprescindible para permitir que Beatriz Mato sexa candidata na Coruña, e Rey Varela en Ferrol. A comunicación de crise obrigou a apurar as novas dotacións previstas para Lugo, cidade na que a aposta do Partido Popular é máis ben pobre, por diversos motivos.

En primeiro lugar, o candidato Carballo non é conselleiro, polo que careceu da plataforma ideal para potenciar a súa imaxe pública. Logo están os problemas no seo da formación: hai escasa sintonía entre o propio Carballo, presidente da agrupación local, e a homóloga da provincial, Elena Candia. E por último, hai insatisfacción co traballo do voceiro Antonio Ameijide na corporación, onde o Partido Socialista ten particular febleza.

A dirección do Partido Popular hai tempo que descartou recuperar a cidade e considera excesivamente custosos os compromisos acadados. Mais, descuberto o ardid do plan integral, Feijóo tivo que incrementar a súa presencia en Lugo e adiantar valiosos anuncios, incluíndo o da aceleradora de empresas aeronáuticas, operativo en novembro co soporte de 4,75 millóns de euros ata 2021. Un alto custe político para trece días.

DEIXAR UN COMENTARIO

Please enter your comment!
Please enter your name here