Os Xornais de Lugo, do lado da innovación no gran día do CEI Nodus

Autoridades, escolares e empresarias interesáronse polo proxecto emprendedor e innovador de Lugo Xornal, Xornal de Lemos e Xornal da Mariña

A xornada de portas abertas supuxo o colofón a un mes intenso no CEI Nodus | Óscar Bernárdez
A xornada de portas abertas supuxo o colofón a un mes intenso no CEI Nodus | Óscar Bernárdez

A piques de celebrar cinco meses de actividade, os Xornais de Lugo tiveron a oportunidade de compartir o seu proxecto na xornada de portas abertas do CEI Nodus, o Centro de Empresas e Innovación de Lugo. O complexo de Garabolos atópase na actualidade no cen por cen de ocupación nos 27 espazos para empresas, entre o viveiro, o sementeiro, os obradoiros e laboratorios e a Aula Coworking.

Entre os protagonistas da innovación e o emprendemento da provincia estivo Xornal de Lugo S.L., matriz dos tres xornais que abranguen os temas de interés dos 67 concellos lucenses e as comarcas galegofalantes estremeiras do Eo e O Bierzo. A rede que compoñenXornal da Mariña, Lugo Xornal e Xornal de Lemos constitúe a primeira iniciativa xornalística en galego que vencella estas zonas. Os tres medios están asociados a Xornal de VigoGaliciaConfidencial, que achega soporte técnico e comercial.

A xornada de portas abertas comezou ás 10.00 horas do venres coa visita institucional. Cada hora, grupos guiados puideron apreciar os diferentes proxectos emprendedores sitos no CEI Nodus, abertos a curiosos e futuros inversores, e a feria expositiva. A ocasión supuxo o colofón dun mes vibrante, logo do Demoday, a presentación en comunidade de 18 iniciativas empresariais. Toda unha oportunidade para amosar o modelo de xornalismo que propugnan os novos Xornais de Lugo.

Para a tardiña quedou o mellor do programa de Mujeres Empresarias, un homenaxe ás emprendedoras. Xunto coa animación e o karaoke para os cativos presentaron o Taller Global Muiñeira, para logo rematar a festa co concerto Voces de Muller. Dende as 19.00 horas, os decibelios correron a cargo de Sara Fernández Arias, Alexandra Pérez, Verónica Cambón, Raiceira, Rut León e David Taboada, Chigliak, West Side Bones e Barbarian Prophecies.

1 COMENTARIO

  1. Adiante! Sempre en ABERTO e sempre aceptando os comentarios sen RETARDO !!!
    É o único camiño para fidelizar á parroquia !!! (aínda que algúns podan abusar ao final compensa!)

DEIXAR UN COMENTARIO

Please enter your comment!
Please enter your name here