As rutas por catamarán no Miño e o Sil reciben xa máis de 6.500 reservas

A Deputación de Lugo asegura que o verán arrinca "cunha boa previsión de ocupación".

Ruta en catamarán. DEPUTACIÓN DE LUGO

A deputada de Turismo da Deputación de Lugo, Pilar García Porto, anunciou este xoves, tras a xunta de goberno, que contan con máis de 6.500 reservas para as dúas rutas por catamarán das que dispón a institución, para os meses de xullo e agosto.

Porto asegurou que se arrinca “o verán cunha boa previsión de ocupación, xa son 6.500 as reservas confirmadas para eses meses de xullo e agosto”, o que confirma o “atractivo” de dito servizo.

Un número que pode crecer polo que queda de xuño e “porque cada vez máis este tipo de viaxes se planifican cunha antelación moi reducida”, constatou a tamén portavoz socialista do goberno provincial. “Os datos demostran que é unha oferta atractiva para os veciños de Lugo, tamén desde Galicia, España e mesmo desde o estranxeiro”, resaltou.

Sobre os datos de primavera, desde que arrincou a programación no mes de marzo por estas dúas rutas, que sortean o Sil e o Miño, estes catamaráns foron empregados “por preto de 14.000 persoas, o que é unha cifra moi positiva”. Estas cifras supoñen volver “a niveis previos á pandemia”, celebra Pilar García Porto.