O Arde Lucus contará con reforzo policial para velar pola seguridade cidadá

Búscase vixiar, especialmente, as aglomeracións que poden xurdir durante os dous grandes concertos previstos de Saor Patrol e Tanxugueiras.

Xornada do domingo do Arde Lucus 2018 | Óscar Bernárdez

A Xunta Local de Seguridade do Concello de Lugo, coopresidida pola alcaldesa da capital luguesa, Lara Méndez, e a subdelegada do Goberno na provincia, Isabel Rodríguez, acordou reforzar a presenza policial durante a celebración do Arde Lucus, do 9 ao 12 de xuño, para velar pola seguridade cidadá.

A alcaldesa destacou “a necesaria colaboración entre os distintos corpos: Policía Local, Policía Nacional, Policía Autonómica, Garda Civil de Tráfico, Bombeiros e Protección Civil, para desenvolver un operativo coordinado e eficaz que permita realizar un control efectivo sobre os espectáculos e actividades programadas”.

Dito isto, avanzou que “se reforzarán os efectivos para vixiar, especialmente, as aglomeracións que poden xurdir durante os dous grandes concertos previstos de Saor Patrol e Tanxugueiras, pero tamén para garantir o correcto desenvolvemento dos desfiles, dunha forma específica o desfile escolar (de todos os colexios da cidade), en convivencia co tráfico rodado que se manterá nas vías circundantes ao traxecto polo que discorren estes desfiles e co obxectivo de que causar as menores molestias posibles”.

Lara Méndez apelou de novo á responsabilidade “individual e colectiva da cidadanía”, e convidou a veciñanza a “gozar do primeiro Arde Lucus” (festa de recreación romana e castrexa da cidade das murallas) sen restricións logo de dous anos de pandemia. “Hai que celebralo con sentido e sen baixar a garda”, afirmou a alcaldesa.

Pola súa banda, a subdelegada do Goberno en Lugo, Isabel Rodríguez, comprometeu a “máxima dispoñibilidade” por parte da Subdelegación de Lugo para garantir “o éxito do Arde Lucus”. “A Subdelegación do Goberno, a Policía Nacional e o Subsector de Tráfico da Garda Civil estaremos aí para apoiar a organización e salvagardar a seguridade das persoas”, concluíu Isabel Rodríguez.