Queremos Galego pon autobuses de Lugo a Santiago para manifestarse o 17 de maio

O servizo de autocares sairá desde o Edificio Sindical na Rolda da Muralla e as persoas interesadas poderán anotarse a través de teléfono.

Manifestación de Queremos Galego en Lugo en contra da sentenza do Tribunal Supremo sobre a ordenanza lingüística municipal / EP

A plataforma Queremos Galego fretará autobuses desde Lugo para que quen o desexe acuda este martes, 17 de maio, Día das Letras Galegas, á manifestación anual a favor da lingua que se celebrará en Santiago de Compostela.

En concreto, o servizo de autocares sairá desde o Edificio Sindical na Rolda da Muralla e as persoas interesadas poderán anotarse a través de teléfono.

Queremos Galego, da que forman parte máis de 500 entidades sociais e culturais de Galicia, sairá un ano máis ás rúas de Santiago para evidenciar que a situación do idioma cooficial “non é irrversible” e que “hai alternativas e vontade colectiva” para cambiar a tendencia de perda de falantes.

A plataforma lamenta que a sociedade galega estea “soa” e “sen institucións que a amparen” na defensa da lingua. Por iso, pide ao novo presidente da Xunta, Alfonso Rueda, que “abandone a súa política de agresión sistemática ao galego” e empece a exercer a súa “responsabilidade na defensa dos intereses de Galicia e da súa lingua”.