Lugo súmase á visiblización da fibromialxia, unha enfermidade con acento no sexo, xa que o 95% dos pacientes son mulleres. Así o apuntaron as concelleirías de Muller e Igualdade e Benestar Social, Inclusión e Persoas Maiores suman forzas para visibilizar a fibromialxia, coincidindo co día mundial desta doenza.
Para sacar ás rúas a problemática, o executivo de Lara Méndez xa anunciou que iluminará na noite do xoves ao venres a fachada da Casa Consistorial e a pasarela Tanxurela de cor morada con motivo da efeméride. Esta homenaxe en prol da visibilización será complementada coa charla-coloquio “Convivindo coa fibromialxia”, a cargo do Dr. Carlos García Porrúa, médico reumatólogo, encontro que lugar o xoves, 19 de maio, a partir das 20.00 horas no salón de actos do centro de convivencia Uxío Novoneyra.
A entrada, apuntan dende o consistorio, é libre ata completar aforo. García Porrúa exerceu como especialista en reumatoloxía no Hula, onde compaxinaba a súa actividade clínica coa investigadora e asumiu hai dous anos o posto de director médico no hospital Polusa.
Silvia Alonso e Olga López realizaron un chamamento á veciñanza para que participe nesta xornada para dar visibilidade ao colectivo que padece esta enfermidade, recoñecida como tal pola Organización Mundial da Saúde (OMS) en 1992, e que aínda hoxe en día é unha gran descoñecida para moitas persoas.
Do mesmo xeito, quixeron reivindicar a fortaleza das mulleres afectadas, que loitan por realizar a súa actividade diaria de forma normalizada a pesar de ter unha doenza que abrangue as esferas social, biolóxica e psicolóxica. Ansiedade, perda de memoria e concentración ou alteracións do sono son algúns dos síntomas desta enfermidade “invisible e silenciosa” e crónica, caracterizada pola presenza de dor persistente que pode chegar a ser invalidante, especialmente en localizacións específicas do corpo.
