Os casos activos de coronavirus en Galicia continúan á alza e alcanzan as 4.779 infeccións –383 máis nas últimas 24 horas–, mentres que os contaxios volven superar o medio milleiro, 514 –59 menos–. A presión hospitalaria tamén se incrementa ata as 114 hospitalizacións –dez máis–, así como a taxa de positividade, que marca un 6,98%.
Segundo os datos publicados na mañá deste domingo pola Consellería de Sanidade con rexistros ata as 18,00 horas deste sábado, aumentan a 21 os pacientes ingresados en UCI pola covid en Galicia –seis máis–, e a 93 as persoas hospitalizadas noutras unidades –catro máis–.
Por áreas sanitarias, a presión hospitalaria aumenta en seis das sete, e só se estanca na de Lugo, que continúa con tres ingresados en unidades convencionais e un en UCI. As infeccións activas ascenden de novo nas sete áreas sanitarias galegas, coa de Ourense á cabeza (+129), seguida pola de Vigo (+123), Pontevedra e O Salnés (+40), A Coruña-Cee (+38), Ferrol (+23), Santiago e Barbanza (+17) e Lugo (+13).
Deste xeito, con máis casos colócase a de Vigo, con 1.325; seguida da de Ourense, con 1.263; A Coruña e Cee, con 674; Lugo, con 448; Santiago e Barbanza, con 402; Pontevedra e O Salnés, con 420; e á cola continúa a de Ferrol, con 247. Segundo os últimos datos actualizados na tarde deste pasado xoves polo Ministerio de Sanidade, Galicia conta cunha taxa a 14 días de 148,12 casos por 100.000 habitantes, mentres que a media do Estado español ascende a 171,68.
Segundo os datos actualizados pola Consellería de Sanidade, desde o inicio desta crise sanitaria efectuáronse 2.987.467 PCR en Galicia, que supoñen 6.232 máis que as rexistradas ata o día anterior.
En canto á taxa de positividade das probas PCR –número de infeccións detectadas cada 100 test–, aumenta lixeiramente ata o 6,98%, tras rexistrar un 6,41% o sábado, un 7,7% o venres e aumentar ao 7,94% este xoves, situarse no 6,62% o mércores, nun 6% o martes e comezar esta semana co 7,94%. Por iso, mantense por encima do limiar do 5% que fixa a Organización Mundial da Saúde (OMS) para dar por controlada a pandemia.
