Axentes da Policía Nacional adscritos á Comisaría Provincial de Lugo, en servizo de Radiopatrullas, paralizaron o pasado fin de semana unha festa nun bar da cidade na que había unhas 90 persoas, 23 delas sen levar máscara. Segundo relatou a Policía Nacional, foi alertada o pasado sábado de madrugada debido á celebración dunha festa nun bar do principio da rúa Milagrosa.
Unha vez no lugar, destacaron as mesmas fontes, os axentes comprobaron como na festa había 90 persoas, das que se procedeu á denuncia de 23 por incumprir o uso da máscara debido ao contexto de pandemia pola Covid-19. Tamén a Policía procedeu a abrir un expediente de estranxeiría por irregularidades a un dos clientes, realizou acta de denuncia por permitir o consumo de bebidas na barra e outra por exceso de aforamento.
Ademais, a Policía Nacional destacou que o local “estaba en pleno funcionamento ao tres da madrugada”, polo que tamén incumpría, ao excedelo, o horario de peche. Así mesmo, foi denunciado un dos usuarios do local por desobediencia a axentes da autoridade, segundo o establecido na Lei de Seguridade Cidadá.