O presidente da Federación de Asociacións de Veciños de Lugo, Jesús Vázquez, anunciou este martes que estudan volver mobilizarse por novos servizos para o HULA, como fai cinco anos, cando chegaron a reunir a unhas 40.000 persoas na cidade para reivindicar o servizo pleno de hemodinámica para o hospital.

Agora esgrimiu que o que se reclama é unha unidade de ictus, xa que máis de 800 persoas ven afectadas o ano por esta enfermidade na provincia de Lugo. “É unha reclamación moi necesaria, non hai máis que ver os casos que se constatan ao ano, da orde de 800. O número de casos é moi importante e fai necesario este servizo, como teñen no resto de Galicia”, reivindicou.

Ante a posibilidade de manifestarse e mobilizarse por esta “unidade”, e que estea operativa as 24 horas, o presidente do movemento veciñal aferrouse a que “o faremos”, aínda que advirte que “sempre hai que priorizar o diálogo”. Sexa como sexa, insistiu en que teñen “todo o dereito” a reclamalo, e van a “por todas” para conseguilo.

“Esta reivindicación vai ser unha dos sinais de identidade e onde imos pór máis énfase nas próximas semanas”, avanzou Jesús Vázquez. Anticipou que tratarán de “porse” en contacto co novo conselleiro de Sanidade para “tratar este tema, como ademais imos tratar a incorporación da técnica Da Vinci (robótica) á sanidade pública”. “A unidade do ictus é moi necesaria para a provincia de Lugo, onde ademais temos unha poboación moi envellecida e é unha necesidade imperiosa”, resolveu.