As xornadas para a creación de experiencias de lecer terán unha segunda edición en Lugo

Debido ao éxito destas xornadas, xa que se esgotaron as prazas ofertadas, ábrese o prazo de inscrición para realizar unha nova sesión o 2 de setembro.

Nota De Prensa, Corte E Foto: As Xornadas Para A Creación De Experiencias De Lecer E Turismo Terán Unha 2 Edición Debido Á Súa Boa Acollida. DEPUTACIÓN DE LUGO

A deputada de Réxime Interior, Promoción do Territorio e Turismo da Deputación de Lugo, Pilar García Porto, deulle este martes a benvida aos participantes nas xornadas de introdución á creación de experiencias de lecer e turismo desta provincia, que terán unha segunda edición en setembro.

A actividade, que se celebra no centro de formación dos servizos audiovisuais do organismo provincial, enmárcase dentro da programación do I Congreso de Turismo Experiencial que se celebrará en Lugo no mes de setembro e co que colabora a institución provincial, o Concello de Lugo e a Xunta.

Nesta acción, participan 30 persoas e o aforamento está limitado seguindo os protocolos e recomendacións sanitarias establecidas para a prevención da COVID-19.

Debido ao éxito destas xornadas, xa que se esgotaron as prazas ofertadas, ábrese o prazo de inscrición para realizar unha nova sesión o 2 de setembro. A partir deste martes, poderán anotarse todas as persoas interesadas.

Esta iniciativa aborda aspectos vinculados co turismo de experiencias e os profesionais reciben asesoramento para mellorar a súa actividade e información sobre as ferramentas adecuadas para deseñar, crear e comercializar as súas propias experiencias turísticas.