Lugo dá a benvida aos nenos saharauis que pasarán o verán na cidade

O Concello colabora co programa de acollida Vacacións en Paz recibindo a nove cativos, que abandonan os campamentos de refuxiados durante o máis cru do verán

Ana Abelleira recibe no Concello aos nove nenos e nenas saharauis do programa Vacacións en Paz | Concello de Lugo
Ana Abelleira recibe no Concello aos nove nenos e nenas saharauis do programa Vacacións en Paz | Concello de Lugo

Un total de 325 cativas e cativos saharauis deixarán este verán as inclemencias dos campamentos e serán acollidos en Galicia. Deles, 9 pasarán os tres meses máis cálidos do ano en Lugo, onde foron recibidos este venres pola concelleira de Benestar Social, Igualdade e Inclusión, Ana Abelleira.

A acollida dos pequenos é posible pola achega do Concello de 7.000 euros ao programa Vacacións en Paz, en colaboración coa Asociación Solidaridade Galega co Pobo Saharaui. Entre xullo e setembro inclusive, cinco nenas e catro nenos abandonan o campamento de refuxiados de Tinduf, onde as temperaturas acadan os 50 grados centígrados.

Os rapaces terán en Lugo acceso a boa alimentación, coidado médico e material educativo, que recibiron de Ana Abelleira no Salón de Plenos da casa consistorial. Como mostra de agarimo, tamén se lles fixo entrega duns agasallos, unha mochila e unha camiseta. 

No acto compareceu así mesmo a delegada en Lugo da Asociación Solidaridade Galega co Pobo Saharaui, Manuela Pacín. A representante e maila edil deron a benvida aos cativos e cativas, cun recoñecemento especial para quenes repiten no programa. O recibimento foi extensivo ás familias de acollida, pola súa xenerosidade, fundamental no proxecto.

Vacacións en Paz sería imposible sen a labor da Asociación e o soporte dos concellos galegos que, como o de Lugo, achegan parte dos recursos necesarios. O goberno local leva anos sendo parte da iniciativa, mais recoñece a dificultade que existe á hora de custear a acollida dos xoves refuxiados saharauis.

DEIXAR UN COMENTARIO

Please enter your comment!
Please enter your name here