O Concello anuncia a mellora nas conexións do Ceao e novas actuacións en San Roque

En reunión cos veciños do barrio de San Roque, a alcaldesa adiantou varias actuacións de accesibilidade por máis de 40.000 euros – O compromiso cos empresarios do polígono do Ceao acada os 145.000 euros

Reunión da alcaldesa de Lugo, Lara Méndez, cos veciños de San Roque | Concello de Lugo
Reunión da alcaldesa de Lugo, Lara Méndez, cos veciños de San Roque | Concello de Lugo

Os veciños de San Roque mantiveron este martes unha reunión co equipo de goberno local. O encontro, no que participaron a alcaldesa Lara Méndez, o voceiro Miguel Fernández, e o concelleiro de Infraestruturas Manuel Núñez, serviu para presentar as novas melloras de accesibilidade planeadas para a zona. As actuacións afectarán ás proximidades do centro de saúde e á rúa Outono.

Méndez asegurou que non entendería “outro xeito de xestionar e de facer cidade que non sexa coa nosa xente e a través dos barrios”. Nesta liña, aproveitou para anunciar un investimento de 35.000 euros para mellorar o espazo arredor do centro de saúde do barrio, que a diario empregan 300 persoas. Os traballos servirán para substituír as baldosas por outras de maior adherencia, colocar varandas galvanizadas en oito tramos de Ramón Montenegro, Carril do Xuízo e Pena Anda, e pintar dous novos pasos de peóns no cruce entre as dúas últimas rúas. A meirandes actualizarase a sinalización horizontal.

Vencellado a esta actuación no barrio de San Roque, o executivo local actuará na rúa Outono, na beirarrúa do lado sur desta vía. O plan contempla así mesmo cambiar as baldosas, dispoñer varandas en catro tramos e colocar unha rampa na parte da escada. O orzamento para esta demanda veciñal é de 6.500 euros cun prazo de execución dun mes.

 

Rede viaria do Ceao

Este anuncio para a mellora da accesibilidade en San Roque chega 24 horas despois do encontro entre representantes da asociación de empresarios do polígono do Ceao e as autoridades municipais. Na xuntanza participaron tamén Méndez, Fernández e Núñez. En resposta ás demandas do tecido empresarial, o Concello comprometeu un máximo de 145.000 euros para mellorar as conexións deterioradas polo denso tráfico, en especial polo impacto dos vehículos pesados.

A rehabilitación está dividida en dúas partes e procura “mellorar a seguridade vial e a comodidade dos conductores”, segundo sinalou a alcaldesa.

O proxecto da rúa dos Artesáns consistirá na renovación do pavimento e a reposición da sinalización horizontal. O ámbito de actuación será a calzada esquerda entre Benigno Rivera e a rúa Dos Canteiros e toda a sección entre as rúas dos Canteiros e da Industria. O orzamento é de 73.600 euros, e para o seu financiamento o Concello vén de acadar unha subvención da Consellería de Economía de 58.900 euros. Os 14.700 restantes achegaraos a entidade local. O prazo de execución é dun mes.

En canto á glorieta da avenida Benigno Rivera, as obras inclúen igualmente a renovación do pavimento e a reposición da sinalización existente. O investimento é de 71.000 euros, que o Concello achegará a través do Plan de Barrios, e o prazo de execución, de dous meses. Nos dous casos, o procedemento de contratación iniciarase de maneira inmediata.

DEIXAR UN COMENTARIO

Please enter your comment!
Please enter your name here