Uns 4.200 fogares galegos das provincias de Ourense e Lugo continúan na mañá deste luns con problemas na subministración eléctrica por mor das incidencias derivadas do temporal.

Segundo informaron fontes de Naturgy, durante a noite e a madrugada, os operarios conseguiron solucionar todas as incidencias rexistradas nas provincias da Coruña e Pontevedra, onde se repuxo a subministración a todos os fogares. Con todo, aínda quedan clientes coa corrente interrompida nas provincias de Ourense –3.500 fogares– e Lugo –700–.

As brigadas, operadores de rede e plataforma telefónica de UFD, distribuidora eléctrica de Naturgy, seguen traballando na resolución de todas as incidencias que provocou o paso do temporal ‘Fabien’. Na maior parte, foron causadas pola caída de árbores, ramas e cortizas sobre as liñas.

Para atender os fogares afectados e recuperar canto antes a normalidade, UFD mobilizou a ao redor de 600 persoas entre brigadas, operadores de rede e da plataforma telefónica.

O despregamento de UFD inclúe máis de 170 vehículos, 45 camións e 130 electróxenos co fin de axilizar a reposición da subministración eléctrica. Estes servizos supoñen un reforzo de equipos para atender as incidencias deste fin de semana. Ademais, este domingo incorporáronse dous helicópteros para apoiar as brigadas que traballan, fundamentalmente, nas zonas montañosas das provincias de Lugo e Ourense, as de máis difícil acceso.