O Sindicato Labrego reclama “solucións realistas” fronte á “superpoboación” do xabaril

Pide unha "urxente" reunión coa Xunta e esixen basearse "en estudos científicos que avalen a estratexia a desenvolver".

EU eleva ao Senado a caza con arco do xabaril | Tim Donovan - https://www.flickr.com/photos/myfwcmedia/37302770356/in/photostream/
EU eleva ao Senado a caza con arco do xabaril | Tim Donovan - https://www.flickr.com/photos/myfwcmedia/37302770356/in/photostream/

O Sindicato Labrego Galego solicitou formalmente na Xunta unha reunión “urxente” con responsables de Medio Ambiente para tratar a “declaración de emerxencia cinexética” para a caza do xabaril en Galicia, que cuestionan, e buscar “solucións realistas” para a “superpoboación” desta especie, que está a causar “un gravísimo problema”.

O sindicato explicou, a través dun comunicado, que “calquera decisión que se tome nesta polémica cuestión” debe “partir do consenso dos diversos axentes implicados” e basearse “en estudos científicos que avalen a estratexia a desenvolver”.

“Deixar toda a responsabilidade do control poboacional do xabaril á libre vontade dos tecores, sen ter coñecemento de ningún informe solvente que avale tal decisión, parécenos pura improvisación e unha clara evasión de responsabilidades posiblemente forzadas pola inminencia dunha nova cita electoral”, aseguran.

Por iso, reclaman a Medio Ambiente que lles traslade os informes “nos que baseou a súa decisión” e que abra un diálogo sobre a posibilidade de tomar medidas de control “menos polémicas e, posiblemente, máis efectivas” ante esta situación.

OS ANIMALISTAS ALERTAN DO RISCO

Pola súa banda, o colectivo animalista Libera incidiu en que a “caza diaria” autorizada pola Xunta contra esta especie “porá en grave risco a seguridade da cidadanía, ao posibilitar que se poida disparar no monte durante sete días á semana e con modalidades que só incrementan o risco de accidente”.

Os animalistas, a través dun comunicado, aseguraron que o Executivo autonómico “non achega nin un só dato científico para xustificar a emerxencia cinexética temporal”, e “limítase a sinalar que existe un maior número de danos agrícolas, aínda que este extremo pode estar motivado por un maior interese do agricultor ou gandeiro de cubrir perdas”.

Para este colectivo, os plans da Xunta “son unha auténtica tolemia paracientífica”, cun “claro interese electoralista máis aló das repercusións que pode ter a posibilidade de consentir batidas todos os días da semana durante varios meses na conservación da biodiversidade”.

DEIXAR UN COMENTARIO

Please enter your comment!
Please enter your name here