Un dos radares fixos instalados polo Concello de Lugo na Rolda da Muralla -a vía perimetral que rodea o monumento romano e que constitúe unha das principais arterias de comunicación da cidade- detectou o pasado fin de semana a un condutor que circulaba a 111 quilómetros por hora, cando se trata dunha calzada limitada a 30.
O inspector xefe da Policía Local de Lugo, Jesús Piñeiro, confirmou que o suposto infractor foi “cazado” polo radar instalado entre Porta Miñá e a Porta de Santiago da Muralla romana, na madrugada do sábado para o domingo -14 ao 15 de setembro-, sobre as 05:00 horas.
Nestes momentos, a Policía Local está a instruír dilixencias para a apertura de xuízo oral por un suposto delito contra a seguridade viaria, tendo en conta de que o coche superaba os 90 quilómetros por hora nunha zona limitada a 30.
Precisou que o condutor se enfronta agora a unha posible pena de prisión, multa ou traballos en beneficio da comunidade, ademais dunha hipotética retirada do permiso de conducir por un período de 1 a 4 anos.