A Deputación investirá 72.000 euros nun vial de Castelo, en Lugo

Os investimentos do Plan Único 2018 permitirán un total de nove actuacións en estradas do Concello de Lugo, entre outros investimentos

Reunión cos veciños de Castelo do presidente da Deputación, Darío Campos, a alcaldesa de Lugo, Lara Méndez, o voceiro municipal, Miguel Fernández, e o concelleiro de Infraestruturas, Manuel Núñez | Deputación de Lugo

Os máximos responsables da Deputación e o Concello de Lugo anunciaron este martes un investimento de 72.000 euros na rede viaria da parroquia de Castelo. O avance desta actuación chegou logo dun encontro entre veciños da zona e a alcaldesa, Lara Méndez, o presidente do ente provincial, Darío Campos, e o concelleiro de Infraestruturas, Manuel Núñez.

Méndez informou aos participantes no percorrido de que, con cargo ao Plan Provincial Único de Cooperación, asfaltarase a vía que vai paralela á estrada de Fonsagrada e da pista que conduce ata a igrexa. Amais, no primeiro treito colocarase tamén unha barreira de seguridade no terraplén lateral. As obras na parroquia terán un custe de 72.600 euros.

O Plan Único permitirá acometer neste 2018 outras oito actuacións en estradas do concello. Asemade, está previsto o acondicionamento de dous locais sociais no rural e a humanización da rúa Ramón Montenegro. A partida total para a comarca de Lugo será de 538.000 euros, con medio millón de achega do Deputación, e o restante por parte do Concello.

O Presidente provincial aproveitou a lembrar que, froito da colaboración entre as entidades local e provincial, hai dúas actuacións previstas na contorna do río Rato, por valor de dous millóns de euros. A primeira intervención, no paseo, está en execución, mentres que a segunda consistirá no acondicionamento dun carril bici.

DEIXAR UN COMENTARIO

Please enter your comment!
Please enter your name here