Fomento somete a información pública a construción dunha glorieta na N-VI en Outeiro de Rei

Intersección da N-VI coa estrada autonómica LU-115, en Outeiro de Rei / Google Maps.

O Ministerio de Fomento, segundo publica este xoves o Boletín Oficial do Estado (BOE), iniciou o trámite de información pública do proxecto para a implantación dunha glorieta na intersección do quilómetro 513 da N-VI, ao seu paso por Outeiro de Rei (Lugo).

O proxecto, licitado en 370.000 euros, consiste na transformación en glorieta da intersección existente neste punto, así como a reposición de itinerarios peonís, paradas de autobús, elementos de drenaxe, sinalización, iluminación e outros servizos que resulten afectados as obras.

Nesta área, explicou o Goberno, sitúase unha intersección coa estrada autonómica LU-115 que, á súa vez, serve de acceso á saída 507 da autovía A-6.

A proximidade da ligazón coa A-6, así como a presenza de numerosas industrias situadas no polígono industrial de Outeiro de Rei, provoca que a intersección entre a N-VI e a LU-115 presente un volume de tráfico importante, gran parte do cal realiza o xiro á esquerda nesa intersección.

A maiores, a necesidade dos peóns de cruzar tanto a N-Vi como a LU-115, provoca situacións de inseguridade viaria, acentuadas pola elevada intensidade de tráfico rodado na intersección.

Para solucionar o problema exposto, Fomento proxectou unha glorieta que resolva e ordene a problemática dos xiros á esquerda entre as dúas estradas, “mellorando a seguridade viaria do tramo e facilitando todos os movementos”.