O alcalde de Palas de Rei Pablo Taboada, confirmou que se empregan patrullas de Protección Civil para tratar de localizar cans salvaxes ou lobos que atacan o gando en Vilar de Montes, onde nos últimos días se rexistraron varias agresións ás vacas dun veciño.
E non só iso, senón que, segundo explicou o rexedor, estes cans chegaron a intimidar a máis dun veciño. Por iso, o Concello tomou a decisión de “retirar máis de vinte cans da zona” dende o mes de marzo. Agora que se volven a dar ataques, os efectivos de Protección Civil “están a facer roldas: dúas pola mañá, tres ou catro pola tarde e mesmo á primeira hora da noite”. Non obstante, a busca non obtivo resultados polo momento.
Respecto dos cans “retirados” na zona (que tamén comprende a aldea de Vilar da Ulloa), Taboada comentou que “algúns tiñan propietarios e outros non”. “Recollémolos e entregámosllos á autoridade competente”, abundou. Logo daquelas actuacións, non se detectara “máis presenza” destes cans salvaxes ata os ataques destes últimos días, cando un veciño descubriu varias cabezas de gando danadas.
GARDAR OS ANIMAIS NAS CORTES
Sobre estas agresións en concreto, Pablo Taboada afirmou “descoñecer” se son provocadas por lobos ou por cans salvaxes. “Descoñecemos se son cans ou lobos, pero tentarémolo detectar”, avanzou o alcalde, que recomendou aos veciños de Vilar de Montes e de Vilar da Ulloa que “garden os seus animais nas cortes”, especialmente pola noite.