A Policía Local de Lugo interceptou esta fin de semana un condutor que cometera unha infracción de tráfico e que, posteriormente, obtivo resultado positivo na proba de alcoholemia, na que triplicou o máximo permitido.
Segundo informou a Policía Local, o condutor foi sorprendido na confluencia da Rolda da Muralla coa rúa San Roque cando cometía unha infracción de tráfico. Ao ser sometido ás probas de alcoholemia obtivo 0,77 e 0,78 miligramos de alcol por litro de aire expirado. Por iso os axentes instruíron dilixencias por un suposto delito contra a seguridade viaria polo procedemento de xuízo rápido. Pola súa banda, o vehículo permanecerá inmobilizado ata que cesen as causas, sinalou a Policía Local.
Ademais, a Policía Local interceptou na Avenida da Coruña un vehículo cunha “circulación irregular”, polo que a patrulla procedeu a paralo. Ao comprobar que o condutor presentaba “signos externos” de atoparse baixo a influencia de bebidas alcohólicas, foi sometido ás probas nas que obtivo 0,87 e 0,80 mg/l. Por iso, iniciouse un atestado por conducir un vehículo de motor baixo a influencia do alcol polo procedemento de xuízo rápido, mentres que o vehículo foi inmobilizado.