O delegado da Xunta de Galicia en Lugo, José Manuel Balseiro, criticou este venres ao goberno bipartito da cidade por “non saber que facer” co novo auditorio de Magoi, á espera de ser recepcionado polo concello. Acúsaos de estar “enredando” o asunto, en alusión á solicitude dunha auditoría por parte do Concello.
Balseiro afeou que desde o goberno municipal se pida a convocatoria dunha mesa técnica -unha especie de “auditoría“– en lugar de contar cun programa para encher de contido esta instalación. “Eu creo que o se pretende con isto é única e exclusivamente enredar, porque o goberno municipal non sabe que facer con esas instalacións que están practicamente concluídas para en calquera momento sentar e chegar a un acordo e facer esa cesión”, subliñou. “Ninguén porá en dúbida as certificacións dos técnicos que fixeron o auditorio”.
Ao seu parecer, estas instalacións trátanse da “mellor infraestrutura cultural” da provincia e lembrou que a Xunta “puxo o terreo” e “22 millóns de euros” para o proxecto.