A constitución da Deputación de Lugo producirase previsiblemente o 18

Candia pide a socialistas e nacionalista que deixen gobernar a quen "gañou".

Pleno da Deputación de Lugo | Europa Press

A decisión do Tribunal Superior de Xustiza de Galicia (TSXG) de ordenar a repetición das eleccións locais nunha mesa do municipio de Burela non terá incidencia na constitución da Deputación de Lugo, segundo informaron a EFE fontes do goberno provincial en funcións.

De feito, barállase o día 18 de xullo, xoves da próxima semana, como data para a celebración do pleno de constitución da nova corporación provincial, que salvo sorpresa estará presidida polo socialista José Tomé, se o PSdeG e o BNG chegan a un acordo, dado que entre os dous partidos de esquerda suman un deputado máis que o Partido Popular.

Os mesmos informadores aclararon que a data aínda non quedou fixada de forma oficial, aínda que é o día que se baralla como máis plausible para a celebración dese pleno, que terá lugar, en todo caso, antes da última semana do presente mes de xullo.

Tanto o Partido Popular como o Partido Socialista designaron aos seus deputados provinciais, mentres que o BNG fará o propio no Partido Xudicial de Lugo, segundo informaron desde a organización nacionalista, esta mesma semana.

ELENA CANDIA

Pola sua banda, a portavoz do grupo provincial e presidenta do PP de Lugo, Elena Candia, anunciou que lle remitirá unha carta aos outros dous grupos con representación na Deputación para presentarlles o seu “proxecto de provincia” para gobernar a institución provincial durante o próximos catro anos, porque o seu partido foi “o que gañou as eleccións o pasado mes de maio”.

Despois de dar a coñecer os nomes dos doce deputados do Partido Popular na corporación provincial, Candia dirixiuse publicamente a socialistas e nacionalistas para pedirlles que lles deixen gobernar”, algo bastante improbable a día de hoxe, tendo en conta de que a suma de deputados do PSdeG e o BNG ten maioría absoluta no pleno.

DEIXAR UN COMENTARIO

Please enter your comment!
Please enter your name here