O alcalde de Xermade di que a denuncia da comunidade de montes que preside é por un asunto “persoal”

A denuncia foi presentada por un grupo de comuneiros contra a xunta directiva da entidade.

Monte de Lousada.

O alcalde do concello lugués de Xermade, o socialista Roberto García, declarará en calidade de investigado o próximo 29 de outubro nos Xulgados de Vilalba para responder sobre as supostas irregularidades detectadas na contabilidade da comunidade de montes que preside da parroquia de Lousada.

O xulgado da capital da Terra Chá citou a Roberto García como investigado tras a denuncia presentada por un grupo de comuneiros contra a xunta directiva da entidade por un suposto delito de administración desleal na xestión dos montes veciñais.

A denuncia “deriva das irregularidades detectadas na contabilidade da comunidade nunha auditoría externa encargada por un grupo de comuneiros”. Este informe pericial “independente”, segundo informaron os denunciantes, desvelou no pasado mes de febreiro “defectos graves” no funcionamento da asociación, así como “falta de información e ocultismo na documentación facilitada aos socios”.

Por mor da presentación da denuncia, o Xulgado requiriu o presidente da comunidade para que presentase unha serie de documentos en sede xudicial que reflicta a existencia de dúas contas bancarias cun saldo de 68.000 euros “que non figuran na contabilidade oficial da comunidade de montes entregada aos comuneiros”.

“Esta falta de transparencia na xestión da comunidade de montes de Lousada volveu quedar de manifesto este domingo na celebración da xunta xeral ordinaria. Entre os puntos a tratar que figuraban na orde do día estaba a rendición de contas do ano 2018. Con todo, como vén sendo práctica habitual, non foron facilitados aos comuneiros os extractos bancarios cos movementos efectuados pola xunta directiva nas contas a nome da comunidade”, criticaron os denunciantes.

DESFASAMENTO

Pola súa conta, o pasado venres o alcalde de Xermade negou que existise un “desfasamento” nas contas da comunidade de montes que preside, e deixou claro que “as contas están claras, non hai malversación, nin ningunha cousa irregular“.

En canto ao denunciante, asegurou que é “un comuneiro que é axente de Tráfico en Vilalba”. “Ten un acoso e unha persecución cara a min e a miña familia desde hai anos. El vai ás reunións, non se interesa por revisar as facturas e despois pon pegas e acaba por detrás con xogo sucio. É algo persoal“, engadiu.

Roberto García insistiu en que “non hai nada que ocultar”. “Eu respondo pola directiva e por min da xestión e de que as contas son legais. Non hai motivo para a denuncia, pero el actúa así, á súa maneira”, explicou.

“BO FUNCIONAMENTO”

Pola súa banda, o veciño que encabezou a denuncia presentada en nome do grupo de comuneiros críticos coa xestión da actual xunta, Alfonso Fernández, respondeu a estas declaracións de García negando que se trate de algo persoal. “Simplemente búscase que haxa un bo funcionamento da comunidade de montes, transparente e beneficioso para a parroquia e o conxunto dos comuneiros”, asegurou.

Así, rexeitou “calquera tipo de vinculación política” en relación ao conflito que se vive na comunidade de montes. “A denuncia foi presentada no Xulgado de Vilalba o pasado mes de abril e decidimos non facela pública nese momento porque ía haber eleccións municipais e non queriamos prexudicar o presidente da comunidade, quen tamén se presentaba a alcalde”, subliñou.

Por iso, Fernández pediu a Roberto García “que non trate de enganar aos veciños con falsidades” e reiterou que “o único motivo da denuncia é saír en defensa dos intereses da propia comunidade de montes e da parroquia de Lousada”, así como “velar polos dereitos dos 70 comuneiros afectados”.