O BNG envía centos de postais a Feijóo para reclamar un xulgado de violencia de xénero para Lugo

LUGO (BNG violencia xénero). BNG

O Bloque Nacionalista Galego (BNG) continúa en Lugo coa campaña para lograr a creación dun xulgado específico de violencia de xénero. Para iso, enviou este luns centos de postais a Monte Pío, a residencia oficial do presidente da Xunta, Alberto Núñez Feijóo, nas que reclama “que inicie os trámites necesarios para que Lugo conte con este servizo”.

A concelleira nacionalista Maite Ferreiro explicou que trasladan esta preocupación a Feijóo porque entenden “que a súa implicación tamén é necesaria para conseguir este obxectivo”. E advirte de que van continuar “ata que Lugo conte con este xulgado”.

Neste momento unicamente as cidades de Vigo e A Coruña dispoñen dun xulgado específico de violencia de xénero e que Lugo contase con el suporía “dar cobertura a toda a provincia nesta materia xa que podería atender os casos de violencia de xénero, malos tratos, acoso e custodia de menores, ademais do seguimento das ordes de afastamento antes e despois do xuízo”, apuntou.

Nesta liña, Ferreiro insiste en que “neste momento non existe unha quenda específica de oficio con profesionais para atender este tipo de casos”, polo que propoñen “comarcalizar o servizo e que o xulgado acollese todos os casos que se produzan en Lugo”.

Segundo os datos publicados polo Consello Xeral do Poder Xudicial (CGPJ), “en 2018 na provincia de Lugo cometéronse 696 delitos de violencia machista, case dous casos ao día”, recalcou.