Adif licita a redacción do proxecto da nova estación ferroviaria de Lugo e o seu aparcadoiro subterráneo

"Cúmprese así o compromiso de licitación inmediata deste proxecto, expresado polo ministro de Fomento, José Luís Ábalos, e a presidenta de Adif, Isabel Pardo de Vera, con esta cidade", di o Adif.

Obras da alta velocidade a Galicia | Adif
Obras da alta velocidade a Galicia | Adif

Adif aprobou por máis de 1,1 millóns de euros a licitación dos servizos de consultoría e asistencia técnica para a redacción dos proxectos básico e de construción da nova estación de ferrocarril de Lugo e do aparcadoiro subterráneo de vehículos ligado ás futuras estacións de ferrocarril e autobús, todo iso no marco da nova área de transporte intermodal deseñada para a cidade.

Segundo informou Adif, o proxecto inclúe tamén un paso inferior entre as plataformas da estación ferroviaria, de uso exclusivo para os usuarios do ferrocarril, outro paso inferior peonil de uso libre, que conectará ambos os lados da canle ferroviaria, así como a urbanización e integración urbana de toda a actuación.

O contrato de servizos conta cun orzamento de licitación de 1.117.114,01 euros (IVE incluído) e un prazo de execución de 15 meses, co obxectivo de iniciar as obras durante o próximo exercicio 2020.

“Cúmprese así o compromiso de licitación inmediata deste proxecto, expresado polo ministro de Fomento, José Luís Ábalos, e a presidenta de Adif, Isabel Pardo de Vera, durante a presentación do ‘Anteproxecto da nova área de transporte intermodal de Lugo’, o pasado 4 de marzo”, destaca Adif.

O proceso posto en marcha “segue o establecido no dito anteproxecto”, indica Adif, en “coordinación con outras actuacións que poidan desenvolverse na zona por parte doutras administracións públicas”, como poida ser a futura estación de autobuses, a cargo da Xunta de Galicia.

TRABALLOS

As actuacións incluídas na redacción do proxecto recollen un novo edificio de viaxeiros da estación de ferrocarril, compatibilizando a súa execución co mantemento do servizo ferroviario e evitando afectalo na medida do posible.

Tamén inclúe un novo paso inferior peonil de cidade, que conecte ambos os lados da canle ferroviaria, incluídos os seus accesos, elementos de comunicación vertical e urbanización asociada. A súa execución tamén se compatibilizará coa explotación ferroviaria.

Os traballos realizaranse en coordinación, especialmente, coas administracións locais, tendo en conta o plan urbanístico e con criterios de deseño desde unha perspectiva de xénero.

A urbanización exterior do ámbito da estación e da conexión do paso inferior de cidade coa contorna urbana “prestará especial atención”, destaca Adif, á nova praza intermodal, incluíndo a marquesiña de cubrimiento da mesma. Todo iso en coordinación coas administracións locais e tendo en conta o plan urbano.

Mentres, o novo aparcadoiro subterráneo prestará servizo ás futuras estacións de ferrocarril e autobús. “Pensado para a súa construción de maneira independente aos demais elementos da área intermodal”, matiza Adif.