A modificación do PEPRI desbloquea a confluencia de San Roque coa Ronda

O desenvolvemento urbanístico da zona permitirá eliminar a pasarela, completar a beirarrúa e mellorar a seguridade e a accesibilidade

A xunta de goberno local aprobou a modificación urbanística que desbloquea a contorna de San Roque | Concello de Lugo
Pleno do concello de Lugo | Concello de Lugo

A  modificación puntual do Plan Especial de Protección, Rehabilitación e Reforma Interior (PEPRI) permitirá finalmente o desenvolvemento urbanístico fronte á porta de San Pedro. Nesta zona conflúen, nun sistema de circulación mal rematado, a rúa San Roque, a Ronda da Muralla, Montero Ríos e o Carril das Flores. Pero, de cara a eliminar a pasarela e acondicionar os accesos peonís, o Concello de Lugo requería do prace da Dirección Xeral de Patrimonio Cultural da Xunta.

O pronunciamento positivo do departamento autonómico e do ICOMOS, a organización vencellada a Nacións Unidas que administra sitios protexidos, permitiu ao goberno local aprobar a modificación puntual do PEPRI no rueiro 214A, onde coinciden dous patrimonios da humanidade, a Muralla e o Camiño Primitivo. Así, o Concello dispón do permiso para mudar de xeito radical o vértice perante a porta de San Pedro.

Este lugar emblemático precisa de melloras en seguridade e accesibilidade. Previa notificación á Dirección Xeral de Urbanismo, o executivo elevará a proposta aprobada provisionalmente a pleno, para o seu debate e vista definitiva. O proxecto comprende tres actuacións na vía pública entre San Roque e a Ronda da Muralla, ángulo de intersección con Montero Ríos e o Carril das Flores.

Tal e como adiantou o voceiro municipal, Miguel Fernández, as accións pasan pola eliminación da pasarela existente, a continuación da beirarrúa de San Roque ata a unión con Montero Ríos, e a ampliación do Carril dos Fornos, treito pertencente ao Camiño Primitivo. Estes cambios terán un considerable impacto visual e mellorarán a seguridade e a accesibilidade na contorna.

O Bloque propón eliminar o tapón de Montero Ríos

Aproveitando o que consideran un paso importante, dende o Bloque Nacionalista Galego consideran que é tempo de resolver a barreira urbanística que ocupa o número 2 da rúa Montero Ríos. A edil nacionalista Maite Ferreiro considera que este punto é perigoso pola reducción da beirarrúa nun sitio de paso canda a parada de bus. A área, lembran dende a formación frentista, ten gran valor polo paso do Camiño Primitivo; porén, o predio ten un valado dende hai anos, unha situación de abandono que prexudica a imaxe desta icona monumental. Por iso, solicitan que a modificación do PEPRI permita retirar o tapón.

A concelleira nacionalista Maite Ferreiro á beira do tapón de Montero Ríos | BNG
A concelleira nacionalista Maite Ferreiro á beira do tapón de Montero Ríos | BNG

DEIXAR UN COMENTARIO

Please enter your comment!
Please enter your name here