O secretario da sección sindical da CIG no BBVA e presidente do comité de empresa en Lugo, Miguel Fernández, asegurou que o paro de dúas horas deste luns, de 9,00 a 11,00 horas, foi secundado de forma “masiva”.
De novo volven reivindicar estas protestas que o banco dea marcha atrás ao expediente de regulación de emprego que expón, que reduciu de 3.800 a 3.300 os despedimentos en España, e en Galicia pasan de 122 a 101. No entanto, Fernández censurou que “a postura é igual que ao comezo, o único movemento que se produciu é esa baixada no número de despedimentos”.
“Non nos queda máis remedio que continuar coas mobilizacións. De novo hoxe está convocado un paro de dúas horas, e o mércores convocouse outra xornada de folga as 24 horas”, puntualizou. O paro está a ser “masivo” na mesma medida que o da semana pasada, que case alcanzou o cento por cento, celebrou o sindicalista da Confederación Intersindical Galega.
Miguel Fernández esgrimiu que “non hai motivo”, nin “ningunha causa” para estes despedimentos, “nin económica, nin de organización, como alega a empresa”. “Segue habendo beneficios milmillonarios, e o que pretendemos é que se retire o ERE”, advertiu.
Finalmente, lembrou que esta semana, é a última do período de consultas, con reunións o martes, o xoves e o venres e espera que a empresa “ceda a retirar o ERE”, co que estarían “abertos negociar”.
“Se a empresa considera que lle sobra persoal hai outro tipo de saídas…. A empresa quere despedir maioritariamente a persoas de menos de cincuenta anos. O que busca a empresa é despedir á xente e non pensa nas mellores saídas para o persoal”, critica o tamén presidente do comité de empresa de Lugo.