Campaña da Deputación para fomentar o turismo de proximidade co programa ‘Coñece a túa provincia’

O presidente da Deputación, José Tomé, resumiu que o programa abarca "viaxes de pequenos grupos, dun día de duración" a través da provincia de Lugo.

O presidente da Deputación de Lugo, José Tomé, presenta 'Coñece a túa provincia'. DEPUTACIÓN DE LUGO

O presidente da Deputación de Lugo, José Tomé, informou este venres da aprobación en Xunta de Goberno dun novo programa de fomento de turismo de proximidade bautizado como ‘Coñece a túa provincia’, para o que se destinarán 300.000 euros.

A iniciativa, explicou o presidente provincial, nace “con vocación de continuidade” e desenvolverase este ano e o próximo, coa posibilidade que se prorrogue máis aló de 2022.

José Tomé resumiu que o programa abarca “viaxes de pequenos grupos, dun día de duración” a través da provincia de Lugo. Para iso, convidou a participar a calquera asociación sen ánimo de lucro, que poderán presentar ofertas ata xuño e, en setembro, comezar con estas rutas, que se farán de luns a venres, ata novembro.

En total ofrécense 4.300 prazas e 37 rutas gratuítas, oito na comarca da Mariña, 10 itinerarios na Ribeira Sacra, 11 en Lugo Centro e A Terra Chá e o resto para a comarca de Ancares-O Courel, na montaña da provincia.

Tomé aproveitou para destacar que esta iniciativa se porá en marcha con “recursos propios”, perseguindo favorecer tres dos sectores “máis castigados pola pandemia”, como son o turismo, a hostalaría e o “comercio local”.