Lugo Monumental busca financiamento para demandar o Concello pola suba das taxas das terrazas

Aseguran que o incremento previsto oscila entre o 187% e o 600%. Se ben é certo que non se aplicaría este ano, entenden que é "ilegal" e "pouco ético" a teor do delicado momento económico actual

Terrazas baleiras | LX

A Asociación Lugo Monumental anunciou que puxo en marcha unha campaña para recadar fondos cos que pagar os gastos de presentar unha demanda xudicial contra o Concello polo incremento previsto nas taxas por ocupación da vía pública para a colocación de terrazas.

O seu presidente, Luís Latorre, explicou a EFE que a suba prevista en ditas taxas oscila entre o “187 e o 600%”, algo que ao seu xuízo é “ilegal” e ademais “pouco ético”, por ser exposto —aínda que non se aplicaría este ano— nun momento como este, cando o sector está a pasalo “francamente mal” por mor da pandemia e das restricións.

Aínda que tamén recoñece que “este é probablemente o peor momento posible para recadar fondos para esta demanda”, tamén lembra que “lamentablemente” só hai un prazo de dous meses desde que foi aprobada a subida para interpoñer a reclamación no xulgado, e “vence a finais de febreiro”. “Pola contra”, a medida “adquire firmeza e é moito máis complicado pelexar contra ela”, explica Latorre.

En canto ás posibilidades de éxito desa demanda, Lugo Monumental fixo unha consulta legal e “os avogados e peritos dixéronnos que o estraño é que o Concello non aceptase as nosas alegacións, porque eran manifestas”, precisou Latorre.

FRONTE COMÚN ENTRE AFECTADOS

O presidente do colectivo calcula que a presentación da demanda supoñerá un gasto duns 2.500 euros, cantidade qeu espera reunir en tempo “sen demasiados problemas”. “Xa empezamos a mandar cartas e a poñernos en contacto cos hostaleiros e a resposta está a ser moi boa”, dixo Latorre, quen confirmou que unha ducia de negocios xa mostraron a súa disposición para colaborar.

“A campaña ábrese tanto a locais asociados como non asociados. É unha situación excepcional e entendemos que este chamamento á hostalería é en beneficio de todos os locais”, insistiu.

Lugo Monumental non podería asumir en solitario o custo desa demanda, aclarou Latorre, porque se alimenta unicamente da cota dos asociados, que “é moi baixa”, e non acepta ningún tipo de subvención das institucións públicas, para “manter a súa independencia”.

DEIXAR UN COMENTARIO

Please enter your comment!
Please enter your name here