Os hostaleiros de Lugo estudan presentar un contencioso ante o TSXG contra o peche do sector

Valorarán esa opción logo de coñecerse unha resolución xudicial no País Vasco que permite a reapertura dos establecementos

Cidadáns na terraza dun bar de Lugo a 12 de decembro de 2020. Carlos Castro - Europa Press

Os hostaleiros de Lugo estudan a presentación dun recurso contencioso ante o Tribunal Superior de Xustiza de Galicia (TSXG) contra o peche do sector, logo de coñecerse a resolución no País Vasco que permitiu a reapertura destes establecementos.

O presidente da Asociación Provincial de Empresarios de Hostalaría de Lugo, Cheché Real, indicou que estudarán esa posibilidade co seu gabinete xurídico e así tentar desbloquear a apertura dos negocios. “O importante de todo isto é que hai un tribunal de xustiza que dá a razón aos hostaleiros dicindo que non son o foco do contaxio, como así pode acreditarse ao ternos pechados (en Galicia)”, valorou.

Real celebrou que o fallo xudicial do País Vasco, que se poderá recorrer, “vén dar a razón en que están conculcando dereitos para poder traballar,  gardando obviamente as medidas de protocolo hixiénico sanitarias e todas esas medidas para que eses contaxios sexan mínimos”.

“O único sector que estivo pechado, que segue pechado, que segue con restricións e limitado é o sector da hostalaría”, criticou, para afear que se teña “no punto de mira” de maneira continua.