Conde traslada á alcaldesa de Lugo o seu compromiso de seguir colaborando co tecido empresarial

O vicepresidente económico e conselleiro de Economía, Empresa e Innovación mantivo unha reunión coa alcaldesa de Lugo este mércores

A alcaldesa de Lugo, Lara Méndez, e o conselleiro de Economía, Francisco Conde | ALX

O vicepresidente económico e conselleiro de Economía, Empresa e Innovación, Francisco Conde, mantivo este mércores un encontro coa alcaldesa de Lugo, Lara Méndez, no que lle reiterou a vontade de manter “máxima colaboración” para “continuar impulsando o tecido empresarial do municipio”.

Neste sentido, trasladoulle que a Administración galega mantén intacto o seu compromiso de seguir facilitando financiamento a pemes e autónomos mediante as diferentes ferramentas coas que xa conta, tanto a través da sociedade xestora de fondos de capital risco XesGalicia, como do Igape e do resto de departamentos autonómicos que traballan para favorecer a competitividade das empresas lucenses.

Pola súa banda, a rexedora informou nun comunicado de que adquiriu o compromiso de Conde para apoiar a estratexia ‘Lugo Transforma’. Dita estratexia constitúe un fondo emprendedor municipal co que o Concello prevé mobilizar 12 millóns de euros a través dun fondo para a captación de novos investimentos e empresas para a cidade.