O Eixo Atlántico pide a participación dos concellos na xestión dos fondos europeos para a crise

Este organismo, do que é vicepresidenta Lara Méndez, agrupa 34 municipios de Galicia e o norte de Portugal. Aseguran que a administración local é a que mellor coñece o seu tecido económico e a que mellor sabe que sectores precisan as axudas.

Representantes na Asemblea do Eixo Atlántico | Remitida

O Eixo Atlántico do Noroeste Peninsular remitiu un escrito ao presidente do Goberno, Pedro Sánchez, para trasladarlle a súa solicitude para que os concellos participen na xestión, atribución e programación dos fondos europeos destinados a atenuar a crise económica.

Este organismo, do que é vicepresidenta a alcaldesa de Lugo, Lara Méndez, agrupa 34 concellos de Galicia e o norte de Portugal. O pasado 29 de maio celebrou unha Comisión Executiva, froito da cal xurdiu esta petición que agora comunican ao Goberno. “Os concellos somos os que mellor coñecemos o noso  tecido produtivo local e cales son os sectores que verdadeiramente necesitan esas axudas”, explican. O “estreito” e “permanente contacto” que manteñen con eles é fundamental, aseguran, para xestionar de maneira eficaz a inxección de diñeiro que estes precisan.

Neste sentido, engaden outra cuestión a ter en conta: “Preocúpanos que os fondos para a recuperación estean maioritariamente destinados a subsidiar, en detrimento da inversión produtiva que xera actividade económica”. Por iso, o Eixo aposta por darlles máis peso a autónomos e pequenos empresarios á hora de beneficiarse destas axudas.

Do mesmo xeito, solicitan unha boa coordinación entre os Executivos de España e Portugal para atender as cuestións que afectan aos territorios da fronteira e “optimizar a eficiencia” dos recursos dun e doutro país para “evitar duplicidades que impedirían o aproveitamento dos fondos para unha verdadeira reconstrución económica”.

DEIXAR UN COMENTARIO

Please enter your comment!
Please enter your name here