O Concello de Lugo insiste no bo ritmo do Plan Reanima, con 1.779 solicitudes de axuda tramitadas

O goberno local asegura que "apurou os prazos" co obxectivo de "axilizar ao máximo" o pago desas subvencións para pemes, autónomos e traballadores.

A alcadesa, Lara Méndez, e o edil Álvaro Santos avalían a evolución do Plan Reanima deseñado pola área de Desenvolvemento Local Sostible | ALX

EFE | O goberno local de Lugo informou de que, a falta de 11 días para que finalice o prazo de presentación de solicitudes para o Plan Reanima, foron creados e están en tramitación 1.779 expedientes de autónomos, pemes e familias lucenses que aspiran a recibir a subvencións directas incluídas nese programa municipal, deseñado para paliar as consecuencias da COVID-19 e dotado con 5 millóns de euros.

Segundo o goberno local, nestes momentos hai case unha trintena de funcionarios municipais encargados da tramitación de solicitudes do Plan Reanima. Durante estes días responderon medio milleiro de consultas realizadas por posibles beneficiarios deste programa, que contempla axudas directas de ata 1.200 para autónomos que tiveron que parar a súa actividade.

A alcaldesa, Lara Méndez, precisou que o goberno local “apurou os prazos” para poñer en marcha a sede electrónica do Concello de Lugo “co fin de canalizar toda a documentación relativa a estas axudas”, porque o obxectivo é “axilizar ao máximo o pago para que cheguen canto antes a quen máis as necesita”.

“Desde o minuto un da pandemia, a prioridade do executivo local foi clara: dar resposta ás necesidades derivadas do confinamento, o que significa tomar posición á beira do tecido produtivo, como motor económico e xerador de emprego no concello, sen esquecer, por suposto, a vertente asistencial”, engadiu.

O Plan Reanima, lembrou Méndez en declaracións aos medios de comunicación, vai acompañado doutras medidas, como a exención ou o aprazamento no pago de taxas ou o pago de facturas a provedores para inxectar liquidez na economía local.

DEIXAR UN COMENTARIO

Please enter your comment!
Please enter your name here