O Concello de Lugo disporá dos novos orzamentos o vindeiro luns 13 de xaneiro, segundo confirmaron dende o goberno local. Correspóndense con 100.061.680’84 euros aprobados o pasado novembro e que supoñen un aumento dun 5% respecto do exercicio anterior.
As contas do 2020 sairán publicadas este venres 10 no Boletín Oficial da Provincia, polo que entran en vigor o seguinte día hábil. Así pois, “o prazo de execución que terán estes orzamentos será integramente o do ano, por primeira vez nos últimos exercicios“, indicou a alcaldesa de Lugo, Lara Méndez. Asegura que iso beneficiará o investimento na cidade e as intervencións que xa tiñan programadas.
Os 100 millóns de euros “servirán para acometer proxectos importantes e obras comprometidas en anos anteriores e moi agardadas pola cidadanía”, dixo. Referiuse, por exemplo, á substitucións das canalizacións máis antigas, á construción dunha pasarela sobre a N-VI ou á recuperación e posta en valor do barrio do Carme.
OS ORZAMENTOS EN DETALLE
A rexedora lembrou que as contas de 2020 contemplan un total de 11 millóns de euros de investimentos reais, aos que hai que engadir os dez millóns e medio que se incorporaron en outubro procedentes dos remanentes de crédito e que, entre outras, terán como finalidade a peonalización de Quiroga Ballesteros, o repintado da sinalización viaria ou a construción do saneamento en puntos do rural.
“Estes presupostos permitirán, asemade, destinar 28 millóns a Políticas Sociais e oito a Emprego” para potenciar o emprendemento. Deles, prevese que 700.000€ se destinen especificamente a un programa dirixido a persoas en risco de exclusión. Así mesmo, 3’3 millóns irán orientados ao fomento do e da saúde, e 1’1 millóns para a substitución de canalizacións de fibrocemento na capital.
Por último, Lara Méndez destacou o feito de que o período de alegacións rematou sen que se recibira ningunha. Non foi presentada ningunha reclamación nin por parte de colectivos ou particulares, nin tampouco pola dos grupos da oposición, a pesar de que non apoiaran estas contas.